सर्लाहीको मलङ्गवामा सोमबार जिल्ला समन्वय समिति सभाहलमा महिला जनप्रतिनिधिहरूका लागि जलवायु परिवर्तन र जैविक विविधता संरक्षणसम्बन्धी जिल्ला स्तरीय प्रशिक्षण तथा संवाद कार्यक्रम सम्पन्न भएको छ।

कार्यक्रममा जलवायु परिवर्तनले महिलाको जीवनयापनमा पार्ने असर, कृषि उत्पादनमा देखिएका चुनौतीहरू तथा जैविक विविधता संरक्षणमा महिलाको भूमिकाबारे विस्तृत छलफल गरिएको थियो।

बागमती प्रदेश सभा सदस्य भारती पाठकले असामान्य वर्षा, लामो खडेरी, बाढी, डुबान, शीतलहर र अत्यधिक गर्मीले खाद्य सुरक्षा र महिलाको दैनिक जीवनमा प्रत्यक्ष असर पारिरहेको तथ्याङ्कसहित प्रस्तुती दिनुभयो। जलवायु विशेषज्ञ हेम पाठकले मौसम र जलवायुबीचको भिन्नता स्पष्ट गर्दै विश्वव्यापी असरबारे जानकारी दिनुभयो। उहाँले मानव क्रियाकलापका कारण बढ्दो हरितगृह ग्यास उत्सर्जनले जलवायु संकट गहिरिँदै गएको उल्लेख गर्नुभयो।

जिल्ला समन्वय समिति सर्लाहीका अध्यक्ष कौशल किशोर सिंहको अध्यक्षता तथा प्रदेश सभा सदस्य भारती पाठकको प्रमुख आतिथ्यमा सम्पन्न कार्यक्रममा बरहथवा नगर प्रमुख कल्पना कटुवालसहित विभिन्न पालिकाका महिला जनप्रतिनिधि र सरोकारवाला निकायका प्रतिनिधिहरूले स्थानीय तहमा अपनाइएका न्यूनीकरण तथा अनुकूलनका उपायबारे अनुभव आदान–प्रदान गरेका थिए।

महिला अधिकार तथा स्रोत सञ्जालको आयोजनामा तथा संयुक्त राष्ट्रसंघको खाद्य तथा कृषि संगठन (FAO) को सहयोगमा सम्पन्न प्रशिक्षणले महिलालाई जलवायु परिवर्तन र जैविक विविधता संरक्षणमा सक्रिय भूमिका निर्वाह गर्न प्रेरित गर्ने अपेक्षा गरिएको छ।