छानबिन समिति बनाउन रवि लामिछाने तयार, संसद‍्मा बोल्न पाउनुपर्ने सर्त

२९ वैशाख, काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने आफूमाथि उठेको विषयमा छानबिन समिति बनाउन तयार देखिएका छन् । तर त्यसका लागि उनले एउटा सर्त अघि सारेका छन् ।

चितवनमा शनिबार सञ्चारकर्मीहरुसँग कुरा गर्दै उपप्रधानमन्त्री तथा गृहमन्त्रीसमेत रहेका लामिछानेले संसद बोल्न पाउने आफ्नो अधिकार हनन  हुन नहुने बताए । सहकारी ठगी प्रकरणमा कांग्रेसको मागअनुसार छानबिन समिति बनाइए त्यसलाई स्वीकार गर्न आफू तयार रहेको तर आफूले संसद बोल्न भने पाउनुपर्ने उनको भनाइ थियो । ‘छानबिन समिति बनाए पनि हुन्छ । तर संसद बोल्न पाउनुपर्छ’, उनले भने, ‘नेपाली कांग्रेसले संसद् र आफ्नो दल राष्ट्रिय स्वतन्त्र पार्टीलाई यसो गर, त्यसो नगर भनेर आदेश दिने होइन ।’ सहकारी ठगीका मुख्य आरोपी जिबी राईलाई नियन्त्रणमा लिने प्रयास भइरहेको उनले बताए । निजलाई पक्राउ गर्न प्रक्रियागत काम भइरहेका उनले जानकारी दिए ।

उनले भने, ‘राईलाई पक्राउ गर्न मलेसियाका गृहमन्त्रीसँग कुराकानी भइरहेको छ ।’ कांग्रेसले लामिछानेबारे संसदीय छानबिन समिति गठन नभएसम्म संसद चल्न नदिने अडान लिँदै आएको छ । शुक्रबारको प्रतिनिधिसभा बैठकमा कांग्रेसले यही विषय सम्बोधन नभएसम्म संसद चल्न नदिने घोषणा गरेको थियो भने संसदमा नाराबाजी समेत बेल घेराउ समेत भएको थियो ।  कांग्रेसको अवरोधकै कारण प्रतिनिधिसभा बैठक स्थगित भएर जेठ १ का लागि तोकिएको छ । जेठ १ मा सरकारको नीति तथा कार्यक्रम ल्याउने तय भएपनि कांग्रेसले अवरोध कायमै राख्ने बताएको छ ।