राजदूत नियुक्तिको तयारी अन्तिम चरणमा, २० स्थान खाली
सारांश
- सरकारले रिक्त रहेका २० राजदूत पदमा नियुक्तिका लागि सिफारिस गर्ने तयारी अन्तिम चरणमा पुर्याएको छ।
- परराष्ट्र मन्त्रालयले प्राप्त आवेदनहरूको अध्ययन गरिरहेको र उपयुक्त उम्मेदवार छनोट गरी अर्को सातासम्म मन्त्रिपरिषद्मा सिफारिस गर्ने तयारी रहेको जनाएको छ।
- यसपटक पहिलोपटक खुला आवेदनमार्फत राजदूत नियुक्तिको प्रक्रिया अघि बढाइएको हो।
१९ साउन, काठमाडौं ।
सरकारले रिक्त रहेका २० राजदूत पदमा नियुक्तिका लागि सिफारिस गर्ने तयारी अन्तिम चरणमा पुर्याएको छ। परराष्ट्र मन्त्रालयले प्राप्त आवेदनहरूको अध्ययन गरिरहेको र उपयुक्त उम्मेदवार छनोट गरी अर्को सातासम्म मन्त्रिपरिषद्मा सिफारिस गर्ने तयारी रहेको जनाएको छ। यसपटक पहिलोपटक खुला आवेदनमार्फत राजदूत नियुक्तिको प्रक्रिया अघि बढाइएको हो। मन्त्रालयका अनुसार करिब ३ हजारभन्दा बढी आवेदन परेका छन्। तीमध्येबाट योग्यता, अनुभव र आवश्यक मापदण्डका आधारमा उम्मेदवार छनोट गरिनेछ।
हाल भारत, अमेरिका, चीन, अस्ट्रेलिया, जर्मनी, इजरायल, जापान, दक्षिण कोरिया, मलेसिया, ओमान, कतार, रुस, साउदी अरब, श्रीलंका, बेलायत र स्पेनस्थित नेपाली नियोगमा राजदूत पद रिक्त छन्। त्यसैगरी इजिप्ट, बहराइन, बंगलादेश, म्यानमार तथा संयुक्त राष्ट्रसंघीय नियोग भियनामा कार्यकाल सकिएपछि म्याद थपेर राजदूतहरूले जिम्मेवारी सम्हालिरहेका छन्। यीसहित कुल २० मिसनमा नयाँ राजदूत नियुक्त गर्नुपर्ने अवस्था रहेको छ।
नेपालका २८ वटा राजदूतावास, संयुक्त राष्ट्रसंघका लागि ३ स्थायी नियोग र ८ महावाणिज्यदूतावास गरी हाल ३९ कूटनीतिक मिसन सञ्चालनमा छन्। सरकारले चालु आर्थिक वर्षदेखि दक्षिण अफ्रिका, ब्राजिल र डेनमार्कस्थित नेपाली राजदूतावास बन्द गर्ने निर्णय गरिसकेको छ। हाल न्यूयोर्क, जेनेभा, भियना, बहराइन, बंगलादेश, बेल्जियम, क्यानडा, इजिप्ट, फ्रान्स, कुवेत, म्यानमार, पाकिस्तान, पोर्चुगल, थाइल्यान्ड र संयुक्त अरब इमिरेट्स (यूएई) मा मात्र राजदूत कार्यरत छन्। नेपालमा राजदूत नियुक्ति राजनीतिक तथा परराष्ट्र सेवाका करिअर कूटनीतिज्ञ दुवै समूहबाट गर्ने परम्परा छ। यसपटक पनि सोही अभ्यासलाई निरन्तरता दिने तयारी सरकारले गरेको छ।
प्रतिक्रिया