४ साउन, रौतहट ।

रौतहटको कटहरिया नगरपालिका–५ का पत्रकार रविन्द्र प्रजापति आफ्नै घरमा झुण्डिएको अवस्थामा मृत भेटिएका छन्। अन्दाजी ३० वर्षीय प्रजापति शनिबार राति करिब ९ बजेको समयमा झुण्डिएको अवस्थामा फेला परेको रौतहटका प्रहरी प्रवक्ता डिएसपी दीपक रायले जानकारी दिए। परिवारका सदस्यले तत्कालै उनलाई नजिकैको स्वास्थ्य संस्थामा लगेपछि गरुडा स्थित ग्राण्डी अस्पतालमा पुर्याइएको थियो।

तर, अस्पतालमा चिकित्सकले राति १० बजे उनलाई मृत घोषणा गरेका थिए। प्रजापति कटहरिया म्युजिकल एफएममा कार्यरत थिए। प्रहरीका अनुसार उनी केही दिनयता पारिवारिक तनावमा थिए। यस्तै, जेठको अन्तिम साता उनले सम्प्रेषण गरेको एक समाचारको विषयलाई लिएर कटहरिया नगरपालिकाका मेयर जयप्रकाश जयसवालबाट धम्की आएको प्रारम्भिक जानकारी छ।

पारिवारिक समस्या र धम्कीका कारण उनी मानसिक तनावमा रहेकाले आत्महत्या गरेको हुन सक्ने स्थानीयको अनुमान छ। हाल उनको शव पोस्टमार्टमको लागि प्रादेशिक अस्पताल गौरमा राखिएको छ भने घटनाबारे थप अनुसन्धान भइरहेको जिल्ला प्रहरी कार्यालय रौतहटले जनाएको छ।