सहसचिव भट्टराई सचिवमा बढुवा

३ भदौ, काठमाडौं । 

सहसचिव कमलप्रसाद भट्टराई सचिवमा बढुवा भएका छन्। आज (बुधबार) को मन्त्रिपरिषद् बैठकले उनलाई सचिवमा बढुवा गरेको हो।  उनलाई बागमती प्रदेशको प्रमुख सचिवमा पदस्थापन गर्ने निर्णय भएको सरकारका प्रवक्ता एवं शिक्षामन्त्री सस्मित पोखरेलले जानकारी दिए। उनी हाल बागमती प्रदेशका कायममुकायम प्रमुख सचिवको जिम्मेवारीमा छन्।

साउन २८ बसेको सचिव बढुवा सिफारिस समितिको बैठकले नेपाल प्रशासन सेवाको सचिव पदमा बढुवाका लागि भट्टराई, इन्दु घिमिरे र श्रीकृष्ण नेपालको नाम सिफारिस गरेको थियो। लोक सेवा आयोगका कार्यवाहक अध्यक्ष माधव बेल्वासे नेतृत्वको समितिको बैठकले बागमती प्रदेशका कायममुकायम प्रमुख सचिव भट्टराई, संस्कृति, पर्यटन तथा नागरिक उड्डयन मन्त्रालयकी सहसचिव घिमिरे र एडिबीका वैकल्पिक कार्यकारी निर्देशक नेपाललाई सिफारिस गरेको थियो।  एक नम्बरमा सिफारिस भएका भट्टराई नयाँ निजामती सेवा ऐनमा गर्न लागिएको ३० वर्षे सेवा अवधि र ५५ वर्षे उमेर हदले पनि नछुने भएकाले बढुवा गरिएको बताइन्छ।