रौतहटमा चुनावी परिणामको अर्को पाटो : १२८ उम्मेदवारको जमानत जफत, राज्य कोषमा १२ लाखभन्दा बढी जम्मा

२६ फागुन,रौतहट ।

हालै सम्पन्न प्रतिनिधि सभा निर्वाचनको अन्तिम परिणामसँगै रौतहटमा एउटा रोचक तथ्याङ्क बाहिर आएको छ । जिल्लाका चारवटै निर्वाचन क्षेत्रमा प्रतिस्पर्धा गरेका कुल उम्मेदवारमध्ये झण्डै ९० प्रतिशतको धरौटी रकम जफत भएको छ । जिल्ला निर्वाचन कार्यालय रौतहटले दिएको जानकारी अनुसार, चुनावी मैदानमा उत्रिएका १४२ जना उम्मेदवारमध्ये १२८ जनाले आफ्नो जमानत जोगाउन सकेनन् । कानुनी प्रावधान अनुसार कुल सदर मतको १० प्रतिशत मत प्राप्त गर्न नसकेपछि उनीहरूको धरौटी रकम राज्यकोषमा दाखिल भएको हो ।

जिल्ला निर्वाचन अधिकारी छोटेलाल दासका अनुसार क्षेत्र नं. १ मा कुल ३९ जना उम्मेदवार थिए, जसमध्ये ३४ जनाको जमानत जफत भएको छ । यहाको क्षेत्र नं. २ मा २६ उम्मेदवारमध्ये २३ जनाको धरौटी गुम्यो। यस क्षेत्रमा नेकपा एमाले र जनता समाजवादी पार्टी (जसपा) का उम्मेदवारहरूले समेत न्यूनतम मत कटाउन नसक्नुलाई अर्थपूर्ण रूपमा हेरिएको छ । यस्तै, क्षेत्र नं. ३मा सबैभन्दा धेरै ४० जना उम्मेदवार रहेको यस क्षेत्रमा ३७ जनाको जमानत जफत भयो। यहाँ नेपाली कांग्रेस, एमाले र नेकपा जस्ता ठूला दलका उम्मेदवारहरूकै धरौटी जफत भएको निर्वाचन अधिकारी दासले जानकारी दिए । क्षेत्र नं. ४ मा भने ३७उम्मेदवारमध्ये ३४ जनाको जमानत जफत भएको छ । यस क्षेत्रमा पनि एमाले, जसपा र आजपा जस्ता दलका उम्मेदवारहरूले १० प्रतिशत मत पु¥याउन सकेनन् ।

निर्वाचन कार्यालयका अनुसार, प्रति उम्मेदवार १० हजार रुपैयाँका दरले कुल १२ लाख ८० हजार रुपैयाँ नेपाल सरकारको राजस्व खातामा जम्मा भएको छ । जमानत जोगाउन सफल भएका विजयी उम्मेदवारसहितका अन्य १४ जनाले भने नियमअनुसार प्रक्रिया पु¥याएर निवेदन दिएमा आफ्नो धरौटी रकम फिर्ता पाउनेछन् । यो तथ्याङ्कले रौतहटको चुनावी राजनीतिमा केही सीमित व्यक्ति वा दलको वर्चस्व र ठूलो संख्यामा रहेका स्वतन्त्र तथा साना दलका उम्मेदवारहरूप्रति मतदाताको न्यून आकर्षणलाई स्पष्ट पारेको छ ।