१२ चैत,काठमाडौं ।
प्रतिनिधिसभाका नवनिर्वाचित सांसदहरू शपथ ग्रहणका लागि सिंहदरबारस्थित संसद् भवन परिसरमा उपस्थित भइरहँदा विभिन्न दलका सांसदहरूले आफ्ना प्राथमिकता र प्रतिबद्धता सार्वजनिक गरेका छन् । राष्ट्रिय स्वतन्त्र पार्टीका नवनिर्वाचित सांसद केपी खनालले सञ्चारकर्मीसँग कुरा गर्दै सुशासनका तीन आधार स्तम्भ पारदर्शिता, इमान्दारिता र जवाफदेहिताबाटै परिणाम आउने गरि काम गर्ने बताएका छन् ।
उनले भने, ‘पारदर्शी, इमान्दारिता, जवाफदेहिता—यी नै बीचमा सबै कुरा हुन्छन् । यी तीन कुराबाट डेलिभरी हुन्छन् ।’ यस्तै, रास्वपाका अर्का सांसद रमेश प्रसाइले जनताको अपेक्षा अत्यन्त सामान्य रहेको उल्लेख गर्दै आधारभूत सेवा सहज बनाउनुपर्नेमा जोड दिए । उनले भने, ‘जनताले धेरै ठूलो कुरा मागेका छैनन् । अस्पतालमा बेड पाउन सोर्स–फोर्स लगाउन नपरोस्, सरकारी कार्यालयमा सामान्य काम गराउन घण्टौं, हप्तौं लाइन बस्न नपरोस् । विपद् पर्दा सरकार भएको अनुभूति होस्, राज्यले अभिभावकीय भूमिका निभाओस् भन्ने हो ।’
त्यस्तै, राष्ट्रिय प्रजातन्त्र पार्टीका सांसद ज्ञानेन्द्र शाहले सकारात्मक र रचनात्मक भूमिकामा रहने प्रतिबद्धता व्यक्त गरेका छन् । उनले भने, ‘अहिले हामी सकारात्मक काममा, राम्रा काममा साथ र सहयोग गरेर अगाडि बढ्ने छौं । देश र जनताको हितमा काम गर्ने पक्षमा हुन्छौं ।’
प्रतिक्रिया