जीवित बन्धकहरूको नयाँ सूचीमा बिपिनको नाम सार्वजनिक

२६ असोज, गाजा ।

गाजामा हमासको नियन्त्रणमा रहेका नेपालका बिपिन जोशी जीवित रहेको नयाँ सूची सार्वजनिक भएको छ। यसअघि उनको अवस्था अज्ञात रहेको समाचार सीएनएनले प्रकाशित गरेको थियो।  तर अहिले टाइम्स अफ इजरायलले जारी गरेको २२ जना जीवितको सूचीमा बिपिनको नाम  पनि समावेश छ ।  मृतक २६ बन्धकमा सन् २०१४ मा मारिएका एक इजरायली सैनिक पनि समावेश छन्। शुक्रबारदेखि सुरु भएको युद्धविरामले अक्टोबर ७, २०२३ देखि सुरु भएको दुई वर्षे विनाशकारी युद्ध अन्त्य हुने आशा जगाएको  छ।  गाजाको स्वास्थ्य मन्त्रालयका अनुसार युद्धमा ६७ हजार प्यालेस्टिनी मारिएका छन्। इजरायली कारबाहीमा ज्यान गुमाउने आधा महिला र बालबालिका छन्।

गाजाको २० लाख जनसंख्याको ९० प्रतिशत जनसंख्या विस्थापित भएको बताइएको छ । २५१ मध्ये गाजामा हाल ४८ बन्धक छन्। इजरायलले २५ बन्धक मारिएको बताएको छ। शुक्रबार भएको युद्धविरामसँगै सोमबार बन्धक रिहा हुने अपेक्षा गरिएको छ। इजरायलले दुई हजार प्यालेस्टिनी कैदी रिहा गर्ने तयारी गरेको छ। बिपिन गाजामा अहिले जीवित एकमात्र गैर–इजरायली बन्धक हुन्। गाजा सीमाको किबुट्ज अलुमिममा काम र कृषि अध्ययनका लागि पुगेका १७ नेपाली विद्यार्थीमध्ये १० को आक्रमणमा मृत्यु भएको थियो। जोशीले बम आश्रयबाट ग्रेनेड फ्याँकेर धेरैलाई बचाएका थिए। तर आफू घाइते भएर अपहरणमा परेका थिए। केहिदिन अघि मात्रै  सार्वजनिक  गरिएको भिडिओमा उनले भनेका छन्, ‘मेरो नाम बिपिन जोशी हो, म नेपालबाट आएको हुँ। म यहाँ सिक्न र कमाउन कार्यक्रममा कृषि फार्ममा काम गर्दैछु।’