जसपा–लोसपा एकीकरणपछि सर्लाहीका १५ नेता केन्द्रीय समितिमा

३१ साउन, सर्लाही ।

जनता समाजवादी पार्टी (जसपा) नेपाल र लोकतान्त्रिक समाजवादी पार्टी (लोसपा) बीच भएको एकीकरणपछि जसपा, नेपालले गठन गरिएको २७९ सदस्यीय केन्द्रीय समितिमा सर्लाहीका १५ जना नेताले स्थान पाएका छन्। जिल्लाबाट तीन पदाधिकारीसहित १५ जना नेता केन्द्रीय समितिमा समेटिएका हुन्। पार्टीले सार्वजनिक गरेको नामावलीअनुसार सर्लाहीका रामप्रकाश चौधरी उपमहासचिवमा मनोनीत भएका छन्। त्यसैगरी उपेन्द्र महतो र रामप्रवेश बैठा सचिवको जिम्मेवारीमा चयन भएका छन्।

केन्द्रीय सदस्यमा जयप्रकाश यादव (जेपी), देवेन्द्र यादव, पल्टन ठाकुर हजाम, पेशल ढकाल, पंचराम तामाङ, मिना यादव, रामेश्वर राय, रामप्रसाद राय यादव, सुनैना चौधरी, सुधिर कुमार यादव, संजय पासवान र संजय कुमार यादव मनोनीत भएका छन्। जसपा–लोसपा एकीकरणपछि पार्टीले नयाँ संरचनालाई औपचारिकता दिँदै केन्द्रीय समिति विस्तार गरेको हो। नवगठित समितिमा महन्थ ठाकुरलाई संरक्षक र उपेन्द्र यादवलाई अध्यक्षको जिम्मेवारी दिइएको छ। त्यस्तै शरतसिंह भण्डारी सहअध्यक्ष तथा रकम चेम्जोङ वरिष्ठ नेताको भूमिकामा छन्। पार्टीले ३३ पदाधिकारीसहित २७९ सदस्यीय केन्द्रीय समिति गठन गरेको जनाएको छ।