१५ पुस, काठमाडौं ।

राष्ट्र, राष्ट्रियता, धर्म, संस्कृति तथा नागरिक बचाऊ अभियानका अगुवा दुर्गा प्रसाईंले आउँदो बिहीबार (पुस १७) सरकारसँग ‘अन्तिम’ वार्ता हुने बताएका छन् । मंगलबार (पुस १५) प्रधानमन्त्री सुशीला कार्कीसँगको भेटवार्तापछि उनले यस्तो घोषणा गरेका हुन् । “सडकको आवाज बेवास्ता गर्ने छुट अब सत्तालाई छैन ।

जनताको मतलाई नीति बनाउने कि आन्दोलन सामना गर्ने—निर्णय सरकारको हातमा छ,” प्रसाईंले सामाजिक सञ्जाल फेसबुकमा लेखेका छन्, “देश सत्ता–सम्झौताले होइन, जनताको आदेशले चल्नुपर्छ । अब अन्तिम वार्ता फेरि आउँदो बिहीबार हुने कुरा जानकारी गराउँछु ।” भेटका क्रममा शान्तिको प्रतीक भगवान् गौतम बुद्धको फ्रेम उपहार प्रदान गरिएको उनले जनाएका छन् । यो उपहार मात्र नभई राज्यलाई स्मरण गराइएको चेतावनी पनि भएको उनको भनाइ छ ।  “वार्ता औपचारिकतामा सीमित रहेन, यसले सत्ताको कक्षसम्म भुइँमान्छेको आवाज जबर्जस्त रूपमा प्रवेश गराएको छ । अब निर्णय कक्षमा जनताको पीडा, आक्रोश र अपेक्षा बोल्न थालेको छ । अब स्पष्ट छ, जनमतसंग्रह कुनै नारा होइन, जनताको सार्वभौम अधिकार हो,” प्रसाईंले भनेका छन् ।