संविधान दिवसको अवसरमा देउवाको सन्देश : ‘संविधानको संरक्षणमार्फत समृद्ध राष्ट्र निर्माणमा अग्रसर बनौं’

३ असोज, काठमाडौं । 

संविधान दिवसको अवसरमा नेपाली कांग्रेसका सभापति एवं पूर्वप्रधानमन्त्री शेरबहादुर देउवाले सम्पूर्ण नेपाली जनतालाई शुभकामना व्यक्त गर्दै लोकतन्त्र, मानव अधिकार र सामाजिक न्यायका मूल्यहरू समेटिएको वर्तमान संविधानलाई संरक्षण गर्दै राष्ट्रलाई समृद्धिको दिशामा लैजान सबैमा आह्वान गरेका छन् । संविधान दिवसका अवसरमा शुभकामना सन्देश जारी गर्दै सभापति देउवाले नेपाली जनताले पटक–पटक गरेका ऐतिहासिक आन्दोलन, संघर्ष र क्रान्तिको फलस्वरूप २०७२ सालको असोज ३ गते संविधान जारी भएको स्मरण गराउँदै त्यसमा योगदान दिने सम्पूर्ण ज्ञात–अज्ञात शहीदप्रति श्रद्धाञ्जली अर्पण गरेका छन् ।

‘नेपाली कांग्रेसको नेतृत्वमा जनताका निर्वाचित प्रतिनिधिद्वारा संविधानसभाबाट जारी भएको संविधान लोकतन्त्र, मानव अधिकार र सामाजिक न्यायका विश्वव्यापी मूल्यहरूमा आधारित छ,’देउवाले उल्लेख गरेका छन्। ‘संविधानको सफल कार्यान्वयनमार्फत संघीय लोकतान्त्रिक गणतन्त्रात्मक शासन व्यवस्थाको संस्थागत स्थायित्व कायम गरी मुलुकलाई आर्थिक समृद्धिको मार्गमा अग्रसर गराउन आजको दिनले प्रेरणा दिने विश्वास लिएको छु,’उनले भने। सभापति देउवाले हाल मुलुकमा देखा परेका राजनीतिक जटिलताहरूको समाधान पनि यही संविधानभित्र खोजिनुपर्नेमा जोड दिएका छन् ।

संविधान नै मुलुकको सर्वोच्च कानुन भएकाले कुनै पनि विशेष परिस्थिति वा समस्या समाधानका लागि संविधानबाहिर जानु घातक हुनसक्ने चेतावनी पनि उनले दिएका छन् । संविधान दिवसको अवसरमा देउवाले न्याय, समानता, स्वतन्त्रता र बहुलवादमा आधारित बहुदलीय संसदीय लोकतान्त्रिक व्यवस्थाको स्थापनार्थ भएका आन्दोलनमा प्राण आहुति दिने वीर सपुतहरूप्रति उच्च सम्मान प्रकट गरेका छन् । ‘राजनीतिक स्थिरता र समुन्नत राष्ट्र निर्माणको साझा संकल्प आजको संविधान दिवसले हामी सबैलाई दिलाएकै छ,’सभापति देउवाको सन्देशमा उल्लेख गरिएको छ ।