पक्राउ रोक्न देउवाले दायर गरेको रिटमा सुनुवाइ सुरु

११ जेठ, काठमाडौं ।

सम्पत्ति शुद्धीकरण अनुसन्धान विभागको पक्राउ पुर्जी कार्यान्वयन नगर्न माग गर्दै पूर्वप्रधानमन्त्री शेरबहादुर देउवाले दायर गरेको रिटमा सर्वोच्च अदालतमा सुनुवाइ सुरु भएको छ । न्यायाधीशद्वय महेश शर्मा पौडेल र नित्यानन्द पाण्डेयको संयुक्त इजलासमा सोमबार (जेठ ११) सुनुवाइ सुरु भएको हो । यसअघि, सर्वोच्चका न्यायाधीश मेघराज पोखरेलको इजलासले अघिल्लो साता पक्राउ पुर्जी प्रकरणमा अन्तरिम आदेश जारी गर्ने र नगर्ने विषयमा छलफलका लागि सोमबारलाई झिकाएको थियो ।

विभागले काठमाडौं जिल्ला अदालतबाट पक्राउका लागि अनुमति लिएपछि क्षेत्राधिकारको प्रश्न उठाउँदै देउवा वारेशमार्फत सर्वोच्च पुगेका हुन् ।  रिटमा जिल्ला अदालतलाई पक्राउका लागि क्षेत्राधिकार नभएको दाबी देउवाको छ । देउवाको तर्फबाट संयुक्त इजलासमा सुनुवाइ चलिरहेको छ । आफूले अनुसन्धानमा सहयोग गर्न तयार रहेको बताउँदै पक्राउ गर्नुपर्ने अवस्था नरहेको दाबी समेत रिटमा गरिएको छ । सर्वोच्चले पक्ष/विपक्षको बहस सकिएपछि पक्राउ पुर्जी रोक्न अन्तरिम आदेश जारी गर्ने वा नगर्ने विषयको टुंगो लगाउनेछ । निर्वाचनअघि हङकङ गएका देउवा दम्पती अझै नेपाल फर्किएका छैनन् ।