प्रचण्डको अभिव्यक्तिप्रति एमालेको आपत्ति

१३ भदौ , नेपाल कम्युनिष्ट पार्टी (एमाले)ले नेकपा माओवादी केन्द्रका अध्यक्ष पुष्पकमल दाहाल प्रचण्डको अभिव्यक्तिप्रति आपत्ति जनाएको छ । बिहीबार पार्टी कार्यलय च्यासलमा बसेको सचिवालय बैठकले बुधबार प्रतिनिधिसधाको बैठकमा विभिन्न देशको घटनासँग जोडेर अध्यक्ष प्रचण्डले विभिन्न आवेगपूर्ण अभिव्यक्ति राखेकोमा ध्यानाकर्षण गराएको पार्टीका सचिव प्रदीप ज्ञवालीले जानकारी दिए ।  उनले भने,‘पछिल्लो समयमा समाजमा केही अराजकताको प्रवृत्ति बढेको जस्तो भएको छ ।विभिन्न देशका घटनासँग जोडेर चर्चा परिचर्चा हुँदै गरेको र संसदमा रहेका कतिपय दलहरू खासगरी सत्ताबाट बाहिरिएसँगै बढी आवेगपूर्ण टिप्पणी र अभिव्यक्ति दिन थाल्नुभएकोप्रति पनि ध्यानाकर्षण भएको छ । यस्तो गैरजिम्मेवारी अभिव्यक्ति कसैले पनि दिनुहुन्न । त्यस्तो कुरामा बढावा दिनुहुँदैन । यस विषयमा पनि बैठकले ध्यानाकर्षण गराएको छ ।’ अध्यक्ष प्रचण्डले श्रीलंका र बंगलादेशको घटना नेपालमा पनि दोहोरिन सक्ने अभिव्यक्ति राखेका थिए ।