१० फागुन, काठमाडौं। सत्तारुढ दल नेपाली कांग्रेसका १ हजार ६३ महासमिति सदस्यले हिन्दूराष्ट्रको पक्षमा हस्ताक्षर गरेका छन् ।

३९ केन्द्रीय सदस्यसहित १ हजार ६३ जनाको हस्ताक्षर बिहीवार पार्टी सभापति शेरबहादुर देउवालाई बुझाइएको छ । नेपाललाई हिन्दूराष्ट्र बनाउने प्रस्ताव पारित गर्न भन्दै केन्द्रीय सदस्य शंकर भण्डारीले बहुमत महासमिति सदस्यको हस्ताक्षर बुझाएका हुन् । ललितपुरमा जारी महासमिति बैठकको बन्दसत्रमा भण्डारीले हस्ताक्षर पार्टी सभापति देउवालाई हस्तान्तरण गरेका छन् । जसमा पूर्वमहामन्त्री डा शशांक कोइरालालगायत सदस्यले हस्ताक्षर गरेका छन् । महासमिति बैठकको बन्दसत्रमा भण्डारीलाई सम्बोधनसहित हिन्दूराष्ट्रको विषय राख्न समय दिइएको थियो ।

पार्टीका बहुमत महासमिति सदस्य र बहुसंख्यक जनताको भावनाअनुसार कांग्रेसले हिन्दूराष्ट्रको पक्षमा निर्णय गर्नुपर्ने नेता भण्डारीले माग गरे । यसअघि २०७५ सालमा ७१७ जना महासमिति सदस्यले यस्तो हस्ताक्षर बुझाएका थिए । त्यो बेला पार्टीले हस्ताक्षर ग्रहण गरेको थिएन । यसपटक भने महासमिति बैठकमा बोल्न समय दिएर हस्ताक्षरको स्वामित्व लिएको छ ।