बीपी राजमार्गमा पूर्ण रूपमा गाडी चलाउन रोक

१८ असोज, काभ्रेपलाञ्चोक ।

रोशीखोलाको सतह बढ्दै गएपछि बीपी राजमार्गमा पूर्ण रुपमा गाडी चलाउन रोक लगाइएको छ । काभ्रेका प्रमुख जिल्ला अधिकारी (सीडीओ) उमेशकुमार ढकालले बीपी राजमार्गमा पर्ने रोशी खोलामा पानीको बहाव बढेको, विभिन्न स्थानमा खहरेखोलामा पहिरो सहित लेदो आएको र केही स्थानमा ढुंगाहरू राजमार्गमा झरेको कारण बीपी राजमार्गमा पूर्ण रुपमा गाडी चलाउन रोक लगाएको जानकारी दिए ।

शुक्रबार रातिबाटै काभ्रेका अधिकांश स्थानमा पानी परिरहेकोले रोशी खोलाको बहाव अत्यधिक बढेको र राजमार्ग डाईभर्सनको रुपमा रहेकोले सम्भावित जोखिम न्यूनीकरणका लागि बीपी राजमार्गमा आवतजावत गर्ने सबै सवारी साधन पूर्ण रुपमा रोक लगाइएको प्रमुख जिल्ला अधिकारी ढकालले बताए । ११ बजेदेखि ठूलो पानी पर्ने मौषमविद्को जानकारी अनुसार काभ्रे जिल्लामा थप तयारीको लागि जिल्ला विपद् व्यवस्थापन समितिको आकस्मिक बैठक बोलाईएको समेत प्रमुख जिल्ला अधिकारी ढकालले जानकारी दिए ।

बीपी राजमार्गमा धुलिखेल हुँदै गएका सवारी साधन काभ्रेभन्ज्याङ र भकुण्डेमा रोकिएका छन् भने सिन्धुलीबाट आएका सवारी साधन नेपालथोक र खुर्कोटमा रोकिएको इलाका प्रहरी कार्यालय मंगलटारका प्रमुख प्रहरी निरीक्षक ईश्वर कार्कीले जानकारी दिए । उनका अनुसार रोशी खोलामा पानीको बहाव बढेको, रोशी ९ को पिन्थली र विरुवाडाँडामा लेदो झरेको तथा माम्तीमा ढुंगा खसेको जानकारी दिए ।

गत वर्ष असोजको बाढीपहिरोले बीपी राजमार्गअन्तर्गत काभ्रेपलाञ्चोकको चौकीडाँडादेखि सिन्धुलीको बर्खेखोलासम्मको सडकखण्डमा क्षति भएको थियो । सडक बगाएका कारण डाईभर्सन गरि अस्थायी रुपमा सडक सञ्चालनमा ल्याइएको थियो । पूर्वी नेपाल जोड्ने छोटो दूरीको उक्त राजमार्गबाट दैनिक सयौं यातायातका साधान आउजाउ गर्छन् । क्षतिग्रस्त राजमार्ग स्थायी निर्माणका लागि चार खण्डमा निर्माण गर्ने गरी ठेक्का लागिसकेको छ ।