मन्त्री हेरफेरको तत्काल कुनै संकेत छैनः मुख्यमन्त्री सिंह
सारांश
- मधेस सरकारको नेतृत्व फेरबदलको चर्चा सेलाएसँगै मन्त्री हेरफेरको अवस्था पनि तत्कालका लागि टरेको छ ।
- एक वर्षमा मन्त्रीमण्डल हेरफेर गर्ने भनिए पनि संघीय गठबन्धन मौन रहेपछि तत्काल मन्त्री हेरफेर नहुने देखिएको हो।
- मधेस सरकारका मुख्यमन्त्री सतिस सिंहले तत्काल मन्त्री हेरफेर हुने अवस्था नरहेको बताए ।
१८ साउन, जनकपुर ।
मधेस सरकारको नेतृत्व फेरबदलको चर्चा सेलाएसँगै मन्त्री हेरफेरको अवस्था पनि तत्कालका लागि टरेको छ । एक वर्षमा मन्त्रीमण्डल हेरफेर गर्ने भनिए पनि संघीय गठबन्धन मौन रहेपछि तत्काल मन्त्री हेरफेर नहुने देखिएको हो। मधेस सरकारका मुख्यमन्त्री सतिस सिंहले तत्काल मन्त्री हेरफेर हुने अवस्था नरहेको बताए । संघीय गठबन्धनबाट प्रदेश सरकारमा सहभागी मन्त्रीहरू हेरफेरबारे अहिलेसम्म कुनै संकेत नआएकाले तत्कालका लागि त्यो सम्भावना टरेको उनको भनाइ छ ।
एक वर्ष कार्यकाल पुगेको भन्दै जनमत पार्टीले आफ्ना मन्त्रीहरूलाई जेठमा फिर्ता बोलाएको थियो । जनमतले आफ्ना मन्त्री फिर्ता बोलाएपछि मधेस सरकारमा मन्त्रिमण्डल पुनर्गठन हुने चर्चा व्यापक थियो । तर मुख्यमन्त्री सिंहका अनुसार संघीय सत्ता गठबन्धनले अझै मन्त्रिमण्डल पुनर्गठनबारे स्पष्ट संकेत नदिएकोले तत्काल मन्त्रिपरिषद् हेरफेरको सम्भावना न्यून छ । ‘केन्द्रबाट संकेत आए लगत्तै हामी फेरबदल गर्छौ, नहुने होइन । तर संघीय गठबन्धनबाट अहिलेसम्म कुनै ठोस सन्देश आएको छैन,’ उनले बताए ।
संघीय सरकारमा नयाँ गठबन्धनमा बनेपछि गत वर्ष जेठमा गठित मधेस सरकारमा हाल प्रमुख सत्ता घटक नेपाली कांग्रेस, एमाले, जनमत र लोसपा सहभागी छन् । यसरी सरकार निर्माण भएको एक वर्ष पुगेको अवधिमा सत्ता साझेदार जनमत पार्टीले जेठमा आफ्ना दुई मन्त्री फिर्ता बोलाएर नयाँ अनुहार पठाइसकेको छ । यद्यपि, प्रादेशिक राजनीतिमा सक्रिय खासगरी कांग्रेस मुख्यमन्त्रीको नेतृत्व नै फेरबदलको कसरतमा लागिपरेको थियो । तर त्यो कसरत पनि असफल भएसँगै मन्त्रील हेरफेरको अवस्था पनि अहिले रोकिएको छ । सत्तारुढ दलभित्र आन्तरिक शक्ति सन्तुलन मिलाउन बाँकी भएकाले हेरफेर प्रक्रिया ढिलो भएको बताइन्छ ।
प्रतिक्रिया