काठमाडौँ भ्यु टावरको ‘निर्माण साझेदार’ नरेश चेङवाङ पक्राउ
३० असार, काठमाडौं ।
पुरानो बसपार्कमा ‘काठमाडौँ भ्यु टावर’ निर्माणको काम गरिरहेका व्यवसायी मनोज भेटवालका साझेदारलाई प्रहरीले पक्राउ गरेको छ । व्यापारिक साझेदार नरेश कुमार चेङवाङ काठमाडौँको न्युरोडबाट पक्राउ परेका हुन् । ह्रथुमको फेदाप गाउँपालिका वडा नम्बर–४ घर भएर न्युरोड बस्ने चेङवाङलाई न्युरोडबाट पक्राउ गरिएको जिल्ला प्रहरी परिसर काठमाडौँका एक जना अधिकृतले बताए । ४७ वर्षीय चेङवाङविरुद्ध असार ६ मा काठमाडौँ जिल्ला अदालतले ४ करोडको बैङ्किङ कसुर मुद्दामा पक्राउ पुर्जी जारी गरेको थियो ।
सिन्धुली घर भएका राजकुमार बराललाई उनले दिएको ४ करोडको चेक बाउन्स भएको र त्यसबिरुद्ध बैङ्किङ कसुरको जाहेरी जिल्ला प्रहरी परिसर काठमाडौँमा दर्ता भएको थियो । यसअघि असार १३ मा सो टावरका ठेकेदार मनोज भेटवाल पक्राउ परेका थिए । १० करोड बिगो भएको बैंकिङ्ग कसुर मुद्दामा अदालतले भेटवाललाई हाजिर जमानीमा राखेर अनुसन्धान गर्न प्रहरीलाई आदेश दिएसँगै ६ दिन हिरासतमा बसेर उनी रिहा भएका थिए ।
Post Comment