सुनसरी घटनाको प्रभाव : सिरहामा राजमार्ग अवरुद्ध, विराटनगरका विद्यालय बन्द

१२ साउन, विराटनगर । सुनसरीको देवानगञ्ज गाउँपालिका–३, कप्तानगञ्जमा प्रहरीको गोली लागेर एक युवाको मृत्यु भएपछि त्यसको प्रभाव आशपाशका विभिन्न जिल्लामा फैलिएको छ । घटनाको विरोधमा सिरहामा पूर्व–पश्चिम राजमार्ग अवरुद्ध गरिएको छ भने विराटनगरका अधिकांश शैक्षिक संस्था मंगलबार बन्द भएका छन् ।

आइतबार राति दुई समूहबीच भएको झडप नियन्त्रण गर्ने क्रममा प्रहरीले चलाएको गोली लागेर देवानगञ्ज–३ का २४ वर्षीय ओमप्रकाश मेहताको मृत्यु भएको थियो । घटनामा अन्य ९ जना घाइते भएका छन् ।

सोही घटनाको विरोधमा सिरहाको गोलबजार नगरपालिका–८ पुरानो चोक चोहर्वामा स्थानीयले प्रदर्शन गर्दै पूर्व–पश्चिम राजमार्ग अवरुद्ध गरेका छन् । प्रदर्शनकारीहरूले घटनाको निष्पक्ष छानबिन, गोली चलाउनेमाथि कारबाही तथा प्रहरी दमन अन्त्यको माग गरेका छन् । उनीहरूले प्रधानमन्त्रीको राजीनामा समेत माग गरेका थिए ।

जिल्ला प्रहरी कार्यालय सिरहाका प्रहरी उपरीक्षक (एसपी) बासुदेव पाठकका अनुसार प्रदर्शनका कारण करिब आधा घण्टा राजमार्ग अवरुद्ध भएको थियो । आन्दोलनकारीसँगको छलफलपछि सडक सञ्चालनमा आएको प्रहरीले जनाएको छ । यसअघि सोमबार पनि सिरहाका विभिन्न स्थानमा विरोध प्रदर्शन गरिएको थियो ।

यता, घटनापछि सुरु भएको प्रदर्शन र सम्भावित सुरक्षा जोखिमका कारण विराटनगरका विद्यालय तथा कलेजहरू मंगलबार स्वतःस्फूर्त रूपमा बन्द भएका छन् । विराटनगर महानगरपालिकाले औपचारिक रूपमा बिदा घोषणा नगरे पनि विद्यालयहरूले पठनपाठन स्थगित गरेका हुन् ।

महानगरको शिक्षा महाशाखा प्रमुख रामप्रसाद ढुंगेलका अनुसार स्कुल बस सञ्चालनमा अवरोध हुन सक्ने सूचना र सुरक्षा चिन्ताका कारण अधिकांश शैक्षिक संस्था खुलेनन् । “महानगरले बिदा दिने निर्णय गरेको छैन, तर विद्यालयहरूले आफ्नै निर्णयमा पठनपाठन रोकेका हुन्,” उनले भने ।

सुनसरीको घटनालाई लिएर विभिन्न जिल्लामा विरोध प्रदर्शन जारी रहेकाले सुरक्षा निकायले सतर्कता बढाएको छ।