उत्तर पूर्वी भारतमा बाढी : ३४ जनाको मृ*त्यु
सारांश
- यतिबेला मनसुनले भारतको उत्तर पूर्वी राज्यहरूमा भयानक विनाश ल्याएको छ ।
- असम, मणिपुर, सिक्किम र अरुणाचल प्रदेशमा भारी वर्षा, बाढी र पहिरोले ताण्डव मच्चाएको छ ।
- भारतीय मौसम विभागले जुन ६ सम्म भारी वर्षा हुने चेतावनी दिएको छ ।
१९ जेठ, नयाँ दिल्ली ।
यतिबेला मनसुनले भारतको उत्तर पूर्वी राज्यहरूमा भयानक विनाश ल्याएको छ । असम, मणिपुर, सिक्किम र अरुणाचल प्रदेशमा भारी वर्षा, बाढी र पहिरोले ताण्डव मच्चाएको छ । भारतीय मौसम विभागले जुन ६ सम्म भारी वर्षा हुने चेतावनी दिएको छ । तत्कालै कुनै राहतको सङ्केत छैन । यो विपत्तिले अहिलेसम्म ३४ जनाको ज्यान लिएको छ । हजारौँ मानिसहरू घरबारविहीन भएका छन् । धेरै गाउँहरू पानीमा चुर्लुम्म डुबेका छन् । सडक, पुल र बिजुलीका तारहरू भाँचिएका छन् ।
असममा अवस्था सबैभन्दा खराब छ । आइतबारसम्म १५ जिल्लामा बाढीबाट ७८ हजारभन्दा बढी मानिसहरू नराम्ररी प्रभावित भएका छन् । ब्रह्मपुत्र सहित १० नदीहरू खतराको चिन्हभन्दा माथि बगिरहेका छन् । गुवाहाटीमा पहिरोका कारण पाँच जनाको मृत्यु भएको छ । लखिमपुरको घुनासुती क्षेत्रमा बाढीले धेरै गाउँहरू डुबानमा पारेको छ । असमका मन्त्री जयन्त मल्लबरुआले पीडितहरूका लागि ४ लाख रुपैयाँ क्षतिपूर्ति घोषणा गरेका छन् । २८ हजार ३१७ जनाले राहत शिविरमा आश्रय लिएका छन् । तर धेरै क्षेत्रमा सहयोग वितरण सकसपूर्ण बनेको छ । मणिपुरको इम्फाल सहर पानीमा डुबेको छ । मे ३१ देखि निरन्तर वर्षा भइरहेको छ । इम्फाल नदी र नाम्बुल नदी खतराको चिन्हभन्दा माथि छन् । हजारौँ बाढीबाट मानिसहरू प्रभावित भएका छन् भने सयौँ घर क्षतिग्रस्त भएका छन् ।
सुरक्षा बलले धेरै मानिसहरूलाई उद्धार गरेको छ । सिक्किममा, उत्तरी क्षेत्रमा १ हजार ५०० पर्यटक फसेका छन् । मंगन जिल्लामा टिस्टा नदीमा कार बग्दा ८ जना बेपत्ता भएका छन् भने एक जनाको मृत्यु भएको छ । अरुणाचल प्रदेशमा पहिरो र बाढीका कारण ९ जनाको मृत्यु भएको छ । आइतबार, भारतीय वायु सेनाले बोम्जिर नदीमा फसेका १४ जनालाई उद्धार गरेको थियो । यो क्षेत्र तल्लो दिबाङ उपत्यकामा छ । बाढीमा एउटा कार बग्दा ७ जनाको मृत्यु भयो । पहिरोका कारण धेरै सडकहरू बन्द छन् । मेघालयमा ६ जनाको मृत्यु भयो । मिजोरममा पनि ६ जनाको मृत्यु भयो । मिजोरममा पहिरोका कारण एक होटल भत्किँदा ३ म्यानमारेली नागरिकको मृत्यु भएको थियो ।
प्रतिक्रिया