२३ वैशाख, काठमाडौं ।

नेकपा (एमाले)का सांसद योगेश भट्टराईले प्रमुख प्रतिपक्षी नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले नीति तथा कार्यक्रमबारे दिएको अभिव्यक्तिको जवाफ दिएका छन् । आज प्रतिनिधिसभा बैठकमा सांसद भट्टराईले बजेटको सिद्धान्त र प्राथमिकतामा पहिले छलफल गर्ने र नीति कार्यक्रम प्रस्तुत गर्ने विषय ‘खुट्टाले टेक्नुपर्नेमा टाउकाले टेकेको जस्तो’ रहेकाले सच्याइएको बताए ।

“खुट्टाले टेक्नुपर्ने, टाउकाले टेकेको अवस्था थियो । सरकारले यसलाई सच्याएको छ,” उनले भने ।प्रचण्डले आफूले अध्यादेश ल्याएर तीन महिनाअघि नै प्रिबजेट छलफल गरेकामा उल्ट्याइएको भन्दै आपत्ति जनाएका थिए । प्रचण्डले सरकार अप्राकृतिक रहेको र बिचौलिया हाबी भएको भनेर लगाएको आरोपप्रति पनि भट्टराईले आपत्ति जनाए ।“सिसाको घरमा बसेर अर्काको घरमा ढुंगा हान्ने मूर्खता नहोस्,” उनले भने । उनले संविधानको धारा ७६ (२) अनुसार बनेको प्रचण्डको सरकार प्राकृतिक हुने र ओलीको अप्राकृतिक हुने कुन संविधानको व्याख्या गरेको भन्ने आफूलाई अचम्म लागेको बताए ।

उनले सरकारबाट बाहिर रहनुपरेको असन्तुष्टि, छटपटीप्रति सहानुभूति रहेको बताए । भट्टराईले विद्युत् प्राधिकरणका कार्यकारी निर्देशक पदबाट कुलमान घिसिङलाई हटाउँदा ‘मुटुमा नै गोली लागेको जस्तो किन भएको’ भनी प्रश्न गरे । उनले प्रचण्डलाई आफू प्रधानमन्त्री हुँदा प्रधानसेनापति कसरी हटाउनुभयो भन्दै सोधे । “तपाईंले त प्रधानसेनापति नै हटाउनुभएको थियो त । एकपटक सम्झिनु त, प्रधानसेनापतिलाई कसरी हटाउनुभयो ? अस्तिकै कार्यकालमा काम गरिरहेको मुख्यसचिवलाई हटाउनुभयो, हुँदै नभएको राष्ट्रिय सुरक्षा सल्लाहकार खडा गर्नुभयो ।”