९ वैशाख, काठमाडौं ।

प्रधानमन्त्री केपी शर्मा ओलीले आफू र एमालेलाई बेवास्ता गर्न खोजिएकामा कडा प्रतिक्रिया दिएका छन् । मंगलबार काठमाडौंमा आयोजित कार्यक्रममा बोल्दै उनले ‘केपी ओलीबिनाको एमाले’ र ‘एमालेबिनाको नेपाल’ खोज्नेहरूको नियतप्रति प्रश्न उठाए ।‘दुनियाँले यत्रो हमला गरिराखेको छ । केपी ओलीबिनाको एमाले खोजिएको छ, एमालेबिनाको नेपाल बनाउने खेल भइरहेको छ,’ प्रधानमन्त्री ओलीले भने, ‘म त सरक्क छोड्दिन्छु नेतृत्व ।

नियत राम्रो भए मात्र । मिसन ०८४ मा हेर्न पाइनेछ, एमालेबिनाको नेपाल सम्भव छ कि छैन ।’उनले पार्टीभित्रैबाट साथ नपाएको संकेत गर्दै चुनौतीको सामना गर्न आफू तयार रहेको बताए । प्रधानमन्त्री ओलीले पार्टीलाई कमजोर पार्न खोज्नेहरूलाई चुनावी मैदानमै जवाफ दिने पनि बताए । ओलीले समसामयिक अन्तर्राष्ट्रिय राजनीतिको सन्दर्भ पनि जोड्दै आजको विश्व कमाइको प्रतिस्पर्धामा केन्द्रित रहेको टिप्पणी गरे । ‘हिजोको जस्तो विचार, नीति र सिद्धान्तको राजनीति छैन अब,’ उनले भने, ‘अब क्लास स्ट्रगल झनै चर्किँदै जान्छ ।’