२५ चैत, काठमाडौं ।

रास्वपा सभापति रवि लामिछानेले उच्च अदालतको आदेशविरुद्ध सर्वोच्चमा पुनरावेदन गर्ने भएका छन् । जिल्ला अदालत रुपन्देहीको आदेश उच्चले उल्ट्याएपछि सोमबार उनी पुर्पक्षका लागि जेल चलान भएका छन् । उच्च अदालत तुल्सीपुरको बुटवल बेन्चले शुक्रबार जिल्ला अदालतको आदेश उल्ट्याएपछि सोही दिन राति प्रहरीले लामिछानेलाई पक्राउ गरेको थियो ।

शनिबार बिहान रुपन्देही लगेर जिल्ला प्रहरीको हिरासतमा राखिएका उनलाई सोमबार अदालतमा पेस गरी कारागार चलान गरिएको हो । रुपन्देही कारागारको ब्लक ४ मा राखिएका लामिछानेले सहयोगी पत्रकार प्रमोद न्यौपानेमार्फत आफ्ना शुभेच्छुकका लागि चारवटा सन्देश पठाएका छन् । पहिलो, उच्च अदालतको आदेशविरुद्ध सर्वोच्चमा पुनरावेदनका लागि कानुन व्यवसायीहरूले गृहकार्य गरिरहेका छन् । अदालतको आदेशको सम्मान गर्दै आफूले स्वेच्छिक गिरफ्तारी दिन चाहे पनि प्रहरीले अस्वाभाविक हतार र हर्कत देखाएकोमा लामिछानेले दुःख लागेको भनेका छन् । दोस्रो, न्यायको मन्दिरबाट अन्याय हुने छैन भन्नेमा आफू विश्वस्त रहेको बताएका छन् ।

अदालतको आदेशप्रति संकेत गर्दै उनले अहिले उठेका विभिन्न आशंका गलत सावित हुने विश्वास व्यक्त गरेका छन् । लामिछानेको तेस्रो सन्देश पार्टी पंक्तिका लागि छ । पार्टीलाई एक ढिक्का राखेर अभियानलाई निरन्तरता दिन उनले निर्देशन दिएका छन् । सँगै भनेका छन्, ‘सक्नुहुन्छ पार्टी संरचना बढाउनुस्, नसके पनि नघटाउनुस् । अभियानलाई जनताको बीचमा पुर्‍याउनुहोस् ।’ रास्वपा सभापति लामिछानेले आफूमाथि राजनीतिक प्रतिशोध साँधिएको दोहोर्‍याएका छन् । सँगै यसलाई परीक्षाकै रूपमा अर्थ्याउँदै भनेका छन्, ‘पालो सबैको आउँछ । यो परीक्षाको पहिलो विद्यार्थी म भएँ । मैले जसरी नै जाँच अरुले पनि दिनुपर्नेछ ।’ उनले आफू नहडबडाएको र नआत्तिएको पनि टिप्पणी गरेका छन् ।