२२ चैत, पाल्पा —

पाल्पाको रम्भा गाउँपालिका–१, हुँगीमा माछा मार्न गएका एक जना कालीगण्डकी नदीमा शुक्रबार मृत फेला परेका छन् ।  नदीमा मृत फेला परेका हुँगीस्थित असेर्दीका ५२ वर्षीय सञ्जय बोटे रहेको जिल्ला प्रहरी कार्यालय पाल्पाका प्रहरी निरीक्षक सन्दीप बेल्बासेले जानकारी दिए ।

बोटे बिहीबार हुँगीको बिसमुडे घाटस्थित कालीगण्डकी नदीमा माछामार्न भनी घरबाट निस्केको उनका आफन्तले जनाएका छन् । बिहीबार घरबाट हिँडेका बोटे शुक्रबार कालीगण्डकी नदीमा मृत फेला परेको प्रहरीले जनाएको छ । इलाका प्रहरी कार्यालय रामपुरका प्रहरी निरीक्षकको कमान्डमा अनुसन्धानका लागि खटिएको टोलीले प्रारम्भिक अनुसन्धान गरेको छ । मृत बोटेको शव रामपुर अस्पतालमा पोस्टमार्टमका लागि पठाइएको छ ।