२१ माघ,  नेपालमा जारीमा त्रिकोणात्मक महिला टी–२० सिरिजमा थाइल्याण्डले लगातार तेस्रो जित निकालेको छ । तेस्रो जित निकाल्नेक्रममा थाइल्याण्डले सोमबार नेदरल्याण्ड्सलाई १७ रनले हरायो ।  यस श्रृंखलामा नेदरल्याण्ड्सविरुद्ध थाइल्याण्डको यो लगातार दोस्रो जित हो ।

उसले पहिलो खेलमा नेदरल्याण्ड्सलाई ८ विकेटले हराएको थियो ।  आफ्नो चौथो खेलमा थाइल्याण्डले दिएको ८७ रनको लक्ष्य पछ्याएको नेदरल्याण्ड्स १५.५ ओभरमा ६९ रनमा अलआउट भयो । उसका लागि कप्तान बाबेट डे लिडेले २५, आइरिस ज्विलिङले १३ तथा क्यारोलिन डे ल्याङ्गेले १० रन जोडे ।  थाइल्याण्डका लागि ओन्निचा कामचोम्फु र थिपाच्चा पुथावाङले सर्वाधिक तीन/तीन विकेट लिए । त्यसअघि कीर्तिपुरस्थित त्रिवि मैदानमा टस हारेर ब्याटिङको मौका पाएको थाइल्याण्ड १९.५ ओभरमा ८६ रनमै अलआउट भयो ।

उसका लागि चनिदा सुथिरुङले २७ तथा फन्निता मायाले १२ रन जोडिन् । बाँकी ब्याटरले भने दोहोरो अंकमा समेत रन बनाउन सकेनन् । नेदरल्याण्ड्सका लागि आइरिस जिविलिङ्ग, इभा लिन्च र सिल्वर सिजर्सले सर्वाधिक दुई/दुई विकेट लिए । यो जितपछि जारी श्रृंखलामा थाइल्याण्डले तीन खेलबाट ६ अंक जोडेको छ । ऊ तालिकाको शीर्ष स्थानमा छ । चार खेलबाट चार अंक जोडेको नेदरल्याण्ड्स तालिकाको दोस्रो स्थानमा छ ।अंकविहीन नेपाल भने पुछारमा छ । नेपालले अब चौथो खेलमा मंगलबार थाइल्याण्डसँग खेल्ने तालिका छ ।