त्यस्तै दोस्रो स्थानमा रहेको बिराटनगर पहिलो क्वालिफायरमा जित निकाल्दै फाइनल पुग्ने लक्ष्यका साथ जनकपुरसँग भिड्दै छ। क्वालिफायर एकको विजेता सीधै फाइनलमा प्रवेश गर्ने भएकाले दुवै टिमको लक्ष्य फाइनल प्रवेश हुने छ। खेल नेपाली समय अनुसार साँझ ५:३० मा त्रिपुरेश्वर स्थित कभर्डहलमा हुने छ। त्यस्तै आज नै काठमाडौं र धनगढीले इलिमिनेटरमा प्रतिस्पर्धा गर्ने छन्। इलिमिनेटरको विजेता र क्वालिफायर एकमा पराजित टिमवीच क्वालिफायर दुई मा प्रतिस्पर्धा हुने छ। विजेताले क्वालिफायर एकको विजेताविरुद्ध एनकेएलको फाइनल खेल्ने छ।

फ्रेन्चाइज टिमको प्रतियोगिता एनकेएलको पहिलो संस्करणको फाइनल १८ माघमा हुने छ। ६ शहरका ६ टिम सहभागि एनकेएलको पहिलो संस्करणमा जनकपुर नाइट्स (२३), विराटनगर ब्यान्डिट्स (२१), काठमाडौं माभरिक्स (१९) र धनगढी वाइल्डक्याट्स (११) ले लिगको शीर्ष चारमा रहँदै प्ले-अफमा स्थान बनाएका थिए। पुछारका दुई टिम पोखरा लेकर्स (४ अंक) र बुटवलको हिमालयन रेइडर्स (७ अंक) भने लिग चरणबाटै बाहिरिए। एस्ट्रोनिक्स म्यानेजमेन्टद्वारा आयोजित एनकेएल मा ७ वा त्योभन्दा कम अन्तरको हारमा टिमले १ अंक पाउने प्रावधान छ। जित्ने टिमले ५ अंक र स्कोर बराबरी भएमा ३-३ अंक प्राप्त हुन्छ।