काठमाडौँ – नागरिक उन्मुक्ति पार्टीका संरक्षक रेशम चौधरीले प्रधानमन्त्री पुष्पकमल दाहाल ‘प्रचण्ड’सँग भेट गरेका छन्।

उनले सोमबार प्रधानमन्त्री दाहालसँग भेटवार्ता गरेका हुन्। भेटमा नागरिक उन्मुक्तिकी अध्यक्ष एवं भूमि व्यवस्था, सहकारी तथा गरिबी निवारणमन्त्री रञ्जिता श्रेष्ठ पनि सहभागी थिइन्।

भेटवार्ताबारे चौधरीले फेसबुकमार्फत जानकारी दिएका छन्। उनले फेसबुकमा लेखेका छन्, ‘सम्माननीय प्रधानमन्त्रीज्यूसँग सुदूरपश्चिम सरकारसम्बन्धी छलफल भयो।’ स्रोतका अनुसार भेटवार्तामा चौधरीले सुदूरपश्चिम प्रदेश सरकारमा दुई मन्त्री र एक राज्यमन्त्री पाउनुपर्ने माग गरेका थिए। टिकापुर घटनामा अदालतबाट दोषी ठहर भएका चौधरी गणतन्त्र दिवसको अवसरमा आममाफी पाएपछि रिहा भएका थिए।