खरिद ऐन संशोधनसँगै विकास निर्माणले गति लिन्छ : मन्त्री लम्साल

रामेछाप ।

भौतिक पूर्वाधारमन्त्री सुनिल लम्सालले सार्वजनिक खरिद ऐनका कारण विगतमा विकास निर्माणका काम प्रभावित भएको बताउँदै ऐन संशोधनपछि अब विकासका आयोजनाहरूले गति लिने विश्वास व्यक्त गरेका छन् । आइतबार दोलखामा आयोजित कार्यकर्ता भेटघाट कार्यक्रममा बोल्दै मन्त्री लम्सालले सरकारले सार्वजनिक खरिद ऐन संशोधन गरिसकेको उल्लेख गर्दै अब विकास निर्माणका काममा देखिएका कानुनी तथा प्रक्रियागत समस्या क्रमशः समाधान हुने बताए ।

उनले संशोधित खरिद ऐनले विकास निर्माणका काममा देखिएका अधिकांश समस्या समाधान गर्ने दाबी गर्दै काम नगर्ने निर्माण व्यवसायीलाई कालोसूची (ब्ल्याकलिस्ट) मा राखिने चेतावनी दिए ।  ‘खरिद ऐनले अब अधिकांश समस्या समाधान गर्छ। विगतमा भएका कमजोरी सुधार गर्ने काम अब हाम्रो हो, काम नगर्नेलाई ब्ल्याकलिस्टमा राख्छौँ,’ मन्त्री लम्सालले भने ।  उनले सबै योजना एकै आर्थिक वर्षभित्र सम्पन्न गर्न सम्भव नभएपनि आगामी पाँच वर्षभित्र विकास निर्माणसँग सम्बन्धित समस्या समाधानका लागि सरकारले निरन्तर पहल गर्ने स्पष्ट पारे । ‘सबै योजना यही वर्ष सकिँदैनन्, तर पाँच वर्षभित्र सकेसम्म सबै समस्या समाधान गर्ने प्रयास गर्छौँ,’ उनले भने ।