बाढीले डाइभर्सन बगाएपछि वीपी राजमार्ग अवरुद्ध
सारांश
- निरन्तर परिरहेको वर्षाका कारण रोशी खोला र दाप्चाखोलामा आएको बाढीले डाइभर्सन बगाएपछि वीपीराजमार्ग बन्द गरिएको छ।
- रोशी खोलामा पानीको बहाव बढेसँगै राजमार्गको काभ्रे खण्डमा सवारी आगमन बन्द गरिएको हो।
- शनिबार पानी परेर रोशी खोलाको पानीको सतह केही बढेको थियो।
२१ असार, काठमाडौँ ।
निरन्तर परिरहेको वर्षाका कारण रोशी खोला र दाप्चाखोलामा आएको बाढीले डाइभर्सन बगाएपछि वीपीराजमार्ग बन्द गरिएको छ। रोशी खोलामा पानीको बहाव बढेसँगै राजमार्गको काभ्रे खण्डमा सवारी आगमन बन्द गरिएको हो। शनिबार पानी परेर रोशी खोलाको पानीको सतह केही बढेको थियो।
त्यसमाथि आइतबार अपरान्हदेखि ठूलो वर्षा भएपछि रोशी र दाप्चाखोलमा बाढी आएर डाइभर्सन बगाएको हो। काभ्रेका सीडीओ गोपालप्रसाद अधिकारीका अनुसार रोशी खोलामा आएको बाढीले सडक अवरुद्ध गरेका कारण सवारी आगमन बन्द गरिएको हो। घुम्ती भएको ठाउँ र चौकीडाँडा खण्डमा क्षति पुगेपछि तत्कालका लागि सबै किसिमका सवारी साधन बन्द गरिएको हो। ‘डाइभर्सन बगाएपछि अहिले राजमार्गमा सवारी साधन तत्कालका लागि होल्ड भएका छन्। राति यसै पनि आवत–जावत बन्द हुन्छ। पानी रोकियो र सबै कुरा ठिकठाक भएमा भोलि बिहानदेखि सवारी साधन चल्नेछन्। अन्यथा यसै भन्न सकिँदैन’, सीडीओ अधिकारीले नेपालखबरसँग भने। काठमाडौंबाट पूर्वतर्फ गइरहेका सवारी साधन काभ्रेभञ्ज्याङ र पूर्वबाट आइरहेका सवारी साधनलाई मंगलटार तथा नेपालथोकमा होल्ड गरिएको छ।
प्रतिक्रिया