मलङ्गवामा निःशुल्क आँखा तथा स्वास्थ्य शिविर सञ्चालन हुने

११ चैत, सर्लाही ।

मलङ्गवा नगरपालिकाका सबै वडामा निःशुल्क आँखा तथा स्वास्थ्य शिविर सञ्चालन गरिने भएको छ। “समस्या उत्पन्न गर्ने होइन, समस्या समाधान गर्ने मेरो अठोट” भन्ने मूल नारासहित समाजसेवी सोहन कुमार झाको आयोजनामा शिविर सञ्चालन हुन लागेको हो। मलङ्गवा नगरपालिका–२ निवासी झाका अनुसार नगरपालिकाका वडा नं. १ देखि १२ सम्मका सम्पूर्ण नगरबासीलाई लक्षित गरी २०८३ साल जेठ १८ गतेदेखि शिविर सञ्चालन गरिनेछ।

शिविरमार्फत निःशुल्क आँखा परीक्षण, चश्मा वितरण, आँखा सम्बन्धी शल्यक्रिया तथा औषधि वितरण गरिने कार्यक्रम रहेको छ। स्वास्थ्य सेवा पहुँचबाट टाढा रहेका नागरिकलाई सहज रूपमा सेवा उपलब्ध गराउने उद्देश्यले शिविर आयोजना गरिएको आयोजकले बताएका छन्। शिविर सफल बनाउन आवश्यक पूर्वतयारीका कामहरू भइरहेको जनाउँदै आयोजकले स्थानीयबासी तथा सरोकारवालासँग सल्लाह, सुझाव र सहयोगको अपेक्षा गरेका छन्। स्थानीयस्तरमै स्वास्थ्य सेवा उपलब्ध गराउने लक्ष्यसहित सञ्चालन हुन लागेको यस कार्यक्रमले नगरबासीको स्वास्थ्य अवस्थामा सकारात्मक सुधार ल्याउने विश्वास लिइएको छ। साथै, स्वस्थ, शिक्षित र विकसित नगर निर्माणमा सबैको सहकार्य आवश्यक रहेको आयोजकको भनाइ छ।