सर्लाहीमा मोटरसाइकल दुर्घटना हुँदा एक भारतीय युवकको मृत्यु

३० वैशाख, सर्लाही । रामनगर गाउँपालिका–५ बैजनाथ चौकस्थित बरहथवा–मधुबनी भित्री सडकखण्डमा मोटरसाइकल दुर्घटना हुँदा एक भारतीय युवकको मृत्यु भएको छ भने अर्का एक जना घाइते भएका छन् ।

हिजो मंगलबार राति करिब ८ बजे बरहथवाबाट गडहियातर्फ जाँदै गरेको ज ७ प २६१३ नम्बरको मोटरसाइकल आफैं अनियन्त्रित भई दुर्घटना भएको जिल्ला प्रहरी कार्यालय सर्लाहीले जनाएको छ ।

दुर्घटनामा मोटरसाइकल चालक भारतको बिहार राज्य सितामढी जिल्ला ग्राम पंचायत ढेग निवासी अन्दाजी ३५ वर्षीय गौरव पटेल गम्भीर घाइते भएका थिए । उनको टाउको, अनुहार तथा कानबाट रगत बगेको अवस्थामा उपचारका लागि प्रादेशिक अस्पताल मलंगवा पठाइएको थियो । उपचारकै क्रममा चिकित्सकले मंगलबार राति नै उनलाई मृत घोषणा गरेको जिल्ला प्रहरी कार्यालय सर्लाहीको प्रवक्ता तथा डिएसपी सरोज राईले जानकारी दिए ।

दुर्घटनामा मोटरसाइकल पछाडि सवार सोही ठाउँ निवासी बाबु साहेब पटेलका २३ वर्षीय छोरा उज्वल पटेल घाइते भएका छन् । उनको शरीरका विभिन्न भागमा चोट लागेको प्रहरीले जनाएको छ । प्रारम्भिक उपचारपछि थप उपचारका लागि उनलाई भारतको सितामढीतर्फ पठाइएको थियो ।

प्रहरीका अनुसार उज्वल पटेलको सितामढीस्थित बैजनाथ नर्सिङ होमको आईसीयूमा उपचार भइरहेको छ । उनको अवस्था मध्यम रहेको बताइएको छ ।
दुर्घटनामा परेको मोटरसाइकल प्रहरीले नियन्त्रणमा लिएको छ भने घटनाबारे थप अनुसन्धान भइरहेको प्रहरीले जनाएको छ ।