३० फागुन,काठमाडौं ।
डियरवाक इन्स्टिच्युट अफ टेक्नोलोजी (डियरवाक कलेज)ले काठमाडौंस्थित सिफलमा करिब ४० कम्पनीको सहभागितामा ‘डीडब्लु आइटी जब फेयर २०२६’ आयोजना गरेको छ । शनिबार आयोजना गरिएको फेयरमा आइटी क्षेत्रमा अध्ययनरत विद्यार्थी र स्नातकहरूलाई रोजगारी र उद्योगसँग प्रत्यक्ष जोड्ने उद्देश्य राखिएको छ । मेलामा पढ्दै गरेका विद्यार्थीदेखि रोजगारीको खोजीमा रहेका स्नातकसम्म सहभागी भएका छन् । डियरवाक ग्रुपका अध्यक्ष एवं क्याम्पस प्रमुख हितेश कार्कीका अनुसार विद्यार्थी र कम्पनीबीच प्रत्यक्ष संवादको अवसर कम भएकाले यस्तो प्लेटफर्म निर्माण गरिएको हो ।
उनले भने, ‘यो कार्यक्रम हाम्रा विद्यार्थीहरूका लागि मात्र होइन, अन्यहरुका लागि पनि हो । धेरै आइटी कम्पनीहरूले दक्ष जनशक्ति खोजिरहेका छन्, तर विद्यार्थी र कम्पनीबीच प्रत्यक्ष संवादको अवसर कम छ । हामीले यस्तो प्लेटफर्म निर्माण गरेका हौं जहाँ कम्पनी र विद्यार्थी दुवै एउटै स्थानमा आएर संवाद गर्न सकुन । यसले विद्यार्थीलाई कम्पनीहरूको माग बुझ्न र कम्पनीलाई योग्य प्रतिभा भेट्न सजिलो बनाउँछ ।’ यस्तै, डियरवाक भिपी अफ एकेडेमीकी सम्झना पोख्रेलले जब फेयरमा दुई हजार जना भन्दा बढीको सहभागिता रहने भन्दै मेलामार्फत विद्यार्थी र कम्पनी दुवैलाई आवश्यक प्लेटफर्म उपलब्ध गराउने बताइन् ।
उनले भनिन्, ‘हाम्रो लक्ष्य दुई हजार सहभागी गराउने हो । विद्यार्थी र कम्पनीबीच प्रत्यक्ष सम्पर्कको माध्यम अभाव भएको महसुस गरेर मेला सुरु गरेका हौं । कम्पनीहरूले योग्य स्नातक भेट्न कठिनाइ भोगिरहेका छन् भने विद्यार्थीहरू उद्योगको आवश्यकताबारे थाहा पाइरहेका छैनन् । मेलामार्फत विद्यार्थी र कम्पनी दुवैलाई आवश्यक प्लेटफर्म उपलब्ध गराउने हाम्रो उद्देश्य हो ।’ एक्मि इन्जिनियरिङ कलेजबाट सहभागी रमेश प्रसाद बस्यौलाले आफ्नो अनुभव सुनाउँदै मेलाले विद्यार्थीहरूले आफ्नो क्षमता, रुचि र योग्यता अनुसार रोजगारी अवसरबारे बुझ्न सक्ने बताए । रोजगार मेलाले विद्यार्थी र कम्पनीबीच प्रत्यक्ष अन्तरक्रियाको प्लेटफर्म प्रदान गर्दै आएको छ । पहिलो संस्करण रोजगार मेला २०१७ मा २० भन्दा बढी सफ्टवेयर कम्पनी र १२०० भन्दा बढी सहभागी थिए । यस वर्ष दुई हजार भन्दा बढी विद्यार्थी र स्नातकको सहभागिता रहने र करिब ४० भन्दा बढी कम्पनी सहभागी छन् ।
मेलामा सहभागी कम्पनीहरूले इन्टर्नशिप, पूर्णकालिक र अंशकालिक जागिर प्रस्ताव गर्दै अन–द–स्पट अन्तर्वार्ता, प्लेसमेन्ट परीक्षण र कार्यशालाहरू सञ्चालन गरेका छन् । मेलाले विद्यार्थी र कम्पनी दुवैका लागि प्रत्यक्ष लाभ सुनिश्चित गरेको छ । डियरवाक कलेजले यस प्रकारको प्लेटफर्ममार्फत विद्यार्थी र उद्योगबीचको दूरी घटाउने, व्यवसायिक ज्ञान विस्तार गर्ने र रोजगारी अवसर बढाउने लक्ष्य राखेको छ ।
प्रतिक्रिया