भारतबाट ल्याइँदै गरेको गाईको मासु सहित सर्लाहीमा दुई जना पक्राउ

१२ पुष, सर्लाही ।

जिल्लाको सिमावर्ती क्षेत्र संगरामपुर नाका हुँदै भारतबाट नेपालतर्फ आउँदै गरेका एक महिला र एक पुरुषलाई प्रहरीले पक्राउ गरेको छ ।

स्रोतका अनुसार चेकजाँचका क्रममा शंका लागेपछि प्रहरीले ती व्यक्तिहरूलाई रोकी खानतलासी गर्दा झोलाभित्र गाईको मासु जस्तो देखिने करिब एक झोला मासु फेला परेको हो। सोही आधारमा दुवै जनालाई नियन्त्रणमा लिइएको छ। पक्राउ परेका महिला र पुरुषलाई संगरामपुर प्रहरी चौकीमा ल्याएर प्रारम्भिक सोधपुछ गरिएको छ भने आवश्यक कानुनी प्रक्रिया पूरा गरी जिल्ला प्रहरी कार्यालय सर्लाहीमा बुझाउने तयारी भइरहेको बताइएको छ।

जिल्ला प्रहरी कार्यालय सर्लाहीका प्रवक्ता सरोज राईले घटनाबारे थप अनुसन्धान भइरहेको जानकारी दिँदै बरामद गरिएको मासु गाईको नै हो वा होइन भन्ने विषयमा परीक्षणपछि मात्रै यकिन हुने बताएका छन्।

साथै पक्राउ परेका व्यक्तिहरूको स्थायी ठेगाना र घटनामा संलग्नताको विषयमा पनि अनुसन्धान जारी रहेको र त्यसबारे थप विवरण आउन बाँकी रहेको प्रहरीले जनाएको छ।