अविरल वर्षा : ३० जनाको मृत्यु, ११ बेपत्ता
सारांश
- अविरल वर्षापछिको विपत्तिमा परी काठमाडौं उपत्यकाबाहेक देशका विभिन्न भागमा नौजनाको मृत्यु भएको छ ।
- ११ जना बेपत्ता भएका छन् ।
- काठमाडौं उपत्यकाका तीन जिल्लामा २१ जनाको मृत्यु भएको छ ।
१२ असोज, काठमाडौं । अविरल वर्षापछिको विपत्तिमा परी काठमाडौं उपत्यकाबाहेक देशका विभिन्न भागमा नौजनाको मृत्यु भएको छ ।
११ जना बेपत्ता भएका छन् । काठमाडौं उपत्यकाका तीन जिल्लामा २१ जनाको मृत्यु भएको छ । सशस्त्र प्रहरी बल नेपालले विपद् प्रतिकार्यका लागि एक हजार ९४७ सुरक्षाकर्मी परिचालन गरेको छ । सशस्त्र प्रहरी बलका सहप्रवक्ता शैलेन्द्र थापाका अनुसार बाढीपहिरो तथा डुबानमा परी उपत्यकामा २१ जना तथा उपत्यका बाहिर नौजनाको मृत्यु भएको छ ।
१६२ स्थानमा भौतिक क्षति भएको छ । सशस्त्र प्रहरीले उपत्यकाका विभिन्न स्थानमा बाढी तथा डुबानमा परेका नागरिकको उद्धारका लागि २३ वटा बोट परिचालन गरेको छ । सशस्त्रको टोलीले ७६० जनाको सकुशल उद्धार गरेको सहप्रवक्ता थापाले जानकारी दिए । काठमाडौंमा नौ, ललितपुरमा नौ र काभ्रेपलाञ्चोक र भक्तपुरमा तीन–तीन, पाँचथर र धनकुटामा दुई–दुई, झापा र धादिङमा एक–एक जनाको मृत्यु भएको छ । 
भक्तपुरको मध्यपुरथिमी नगरपालिका–१ लोकन्थलीस्थित सुष्मा वीपी कोइराला नेत्र प्रतिष्ठानमा पानी जमेपछि उपचारारत १८ जना अपांगता भएका बालबालिकालाई उद्धार गरी सुरक्षित स्थानमा सारिएको छ ।
प्रतिक्रिया