हेटौंडाका ३० घर डुबानमा, १४१ घरधुरी प्रभावित

२३ असार, हेटौंडा । बागमती प्रदेशको सदरमुकाम हेटौंडाको बजार क्षेत्र डुबानमा परेसँगै १४१ घरधुरी प्रभावित भएका छन् ।

हेटौंडा उपमहानगरपालिका–१, ५ र ७ नम्बर वडाका बस्ती डुबानमा परेका हुन् । शुक्रबार रातिदेखिको वर्षाले राप्ती खोलासँग जोडिएको १ नम्बर वडाको चौकीटोल, ५ नम्बर वडाको पिप्ले र शान्तिनगर क्षेत्र डुबानमा परेको जिल्ला प्रहरी कार्यालय मकवानपुरले जानकारी दिएको छ । ५ नम्बर वडाका पिप्ले र शान्तिनगरका ३० भन्दा बढी घरहरु डुबानमा परेको मकवानपुरका प्रहरी नायव उपरीक्षक लक्ष्मी भण्डारीले जानकारी दिए । प्रहरी र स्थानीयको सहयोगमा डुबानमा परेका घरबाट मानिसको उद्धार गरिएको थियो ।

हेटौंडाको बजार क्षेत्रमा मात्रै डुबानबाट प्रभावित घरधुरी संख्या १ सय ४१ रहेको प्रहरीले जानकारी दिएको छ । हेटौंडा–५ सिंचाइकुना टोलमा २० घर, ५ नम्बर वडाकै लटिनाथ पल्टिङ क्षेत्रमा १५ घर, ५ नम्बर वडाकै लक्ष्मीनारायण मन्दिर आसपास १७ घर, शान्तिनगर टोलमा १३ घर, सानोपोखरामा ३० घर, दक्षिणकाली टोलमा १५ घर, ढुंगेधारा टोलमा ३० घर र हेटौंडा–७ न्युरेनीमा १ घर गरी जम्मा १ सय ४१ घरधुरी प्रभावित भएको प्रहरीले जानकारी दिएको हो ।

हेटौंडा उपमहानगरपालिकाले व्यवस्थित ढल निर्माण नगरेकाले ५ नम्बर वडाको पिप्ले क्षेत्र हरेक वर्ष डुबानमा पर्ने गरेको छ । ५ नम्बर वडाको कर्रा खोला क्षेत्रसँग जोडिएको बस्ती निरन्तर वर्षा भएपछि रातभर जाग्राम बस्ने गरेका छन् । कर्रा खोला उर्लिएर आउँदा ५ नम्बर वडाको क्याम्पाडाँडादेखि ४ नम्बर वडाको कर्रा बस्तीसम्म खतरा हुने गर्दछ ।

हेटौंडाका कार्यवाहाक नगर प्रमुख राजेश बानियाँले डुबान क्षेत्रको निरीक्षण गर्दै नेपाल प्रहरी, नगर प्रहरी र स्थानीयको सहयोगमा डुबानमा परेका स्थानीयहरुलाई उद्दार गरिएको बताए । हरेक वर्ष उक्त क्षेत्र डुबानमा पर्ने भएकाले दीर्घकालीन सोचका साथ उपमहानगरपालिका र प्रदेश सरकारको संयुक्त लगानीबाट डीपीआर बनाएरै दीर्घकालीन समस्या समाधान गरिने बानियाँले जानकारी दिए ।

वर्षाका कारण मकवानपुरको कुखरेनी, कर्रा, राप्ती, मनहरी, लोथर, सामरी, भैंसे खोलामा पानीको बहाव बढेको छ । बाढीका कारण खेतीयोग्य जमिन कटानमा परेका छन् । भैंसे खोलाले विगतका वर्षमा त्रिभुवन राजपथको सडक क्षेत्र कटान गरेको थियो । सामरी, राप्ती, कर्रा, मनहरी खोलाले हरेक वर्ष खेतीयोग्य जमिन कटान गर्ने गरेको छ ।

यसैगरी मकवानपुरगढी गाउँपालिका–२ कृषिडाँडास्थित सन्तबहादुर घलानको गोठ भासिएको छ । चार वटा गाईहरु गोठभित्रै फसेकोमा प्रहरी र स्थानीयले २ वटा गाई सकुशल बाहिर निकालेका छन् । २ वटा गाई भने गोठभित्रै बिरामी अवस्थामा रहेको डिएसपी भण्डारीले जानकारी दिए ।