मधेस आन्दोलनका सहिद परिवारद्वारा प्रदेश सरकारलाई ध्यानाकर्षण

२५  चैत, जनकपुर ।

मधेस आन्दोलनका सहिद परिवार तथा घाइतेहरूले आफ्ना विभिन्न मागहरू तत्काल सम्बोधन गर्न माग गर्दै मधेस प्रदेश सरकारलाई ध्यानाकर्षण गराएका छन् । उनीहरूले प्रदेशका मुख्यमन्त्री, प्रदेश प्रमुख र गृह सञ्चार तथा कानुन मन्त्रालयलाई सम्बोधन गर्दै बुझाएको ध्यानाकर्षण पत्रमार्फत एक हप्ताभित्र माग पूरा नभए शान्तिपूर्ण आन्दोलनमा उत्रिने चेतावनी दिएका छन् । मुख्यमन्त्री कृष्ण यादवलाई बुझाइएको ध्यानाकर्षण पत्रमा सहिद परिवार तथा घाइतेहरूले विगतदेखि नै आफ्ना समस्याहरू मौखिक रूपमा जानकारी गराउँदा समेत सम्बन्धित निकायबाट बेवास्ता हुँदै आएको गुनासो गरेका छन् ।

उनीहरूले मुख्यमन्त्री स्वयं तथा सम्बन्धित मन्त्री र कर्मचारीहरू उदासीन देखिएको आरोप समेत लगाएका छन् । पत्रमा उल्लेख गरिएका मुख्य मागहरूमा मधेसी सहिद प्रतिष्ठानको बजेट सञ्चालन गरी प्रभावकारी कार्यान्वयन गर्नुपर्ने, सहिद परिवारका सदस्यहरूको रोजगारी समस्या समाधान गर्नुपर्ने तथा उनीहरूले गरिरहेको कामको पारिश्रमिक, तलब तथा भत्ता उपलब्ध गराउनुपर्ने रहेका छन् । त्यस्तै, मधेसी सहिद प्रतिष्ठानको ऐन निर्माण गरी संस्थालाई स्वायत्त बनाइनुपर्ने र मधेस आन्दोलनका सहिद तथा घाइते परिवारलाई शिक्षा, स्वास्थ्य तथा रोजगारीमा समावेशी व्यवस्था सुनिश्चित गर्नुपर्ने माग समेत गरिएको छ । सहिद परिवार तथा घाइतेहरूले आफ्नो मागप्रति सरकार गम्भीर नभए एक हप्तापछि शान्तिपूर्ण आन्दोलन सुरु गर्ने स्पष्ट चेतावनी दिएका छन् । सहिद परिवारका सदस्यहरूमध्ये केहीले रोजगारी पाएका छन् तर उनीहरूले विगत ७ महिनादेखि तलब नपाएको मधेसी सहिद प्रतिष्ठानका सदस्य अवदेश पटेलले जानकारी दिए ।