२३ असोज, काठमाडौं। 

नेकपा (एमाले)का महासचिव शंकर पोखरेलले ‘सरकारले चुनाव गराउँछ’ भन्नु भ्रम रहेको बताएका छन् । उनले चुनवका लागि महत्त्वपूर्ण पक्ष राजनीतिक दलसँग कुनै संवाद नथालिनु र सुरक्षाको प्रत्याभूति दिन नसक्नु त्यसको उदाहरण भएको दाबी गरे । भक्तपुरको गुण्डुमा आयोजित पार्टीको कार्यक्रममा पोखरेलले भने, ‘दलहरूसँग अहिलेसम्म संवाद नथालेर दललाई किनारा लगाएर आफू अनुकुलका मानिसहरूलाई चुनावबाट जिताउने ज्ञानेन्द्र शाहको जस्तो तरिका अपनाउने गरी अँध्यारो कुनामा बसेर योजना बनाइँदै छ ।’

पोखरेले सरकारलाई दलको मत जितेर चुनाव सफल बनाउने बाटोमा हिँड्न सुझाव दिएका छन् । त्यस्तै, गृह प्रशासनले समेत उचित सुरक्षा दिने अवस्था नरहेको भन्दै गृहमन्त्री ओमप्रकाश अर्याल विद्रोहीको नेतृत्वकर्ता जस्तो भएको टिप्पणी गरेका छन् । उनले राज्यका सुरक्षा अङ्गले समेत सरकार चुनावप्रति प्रतिबद्ध र जिम्मेवार छ भन्ने कुरामा निश्चित हुन नसकिरहेको बताए । प्रहरीको मनोबल उच्च बनाउने र लुटिएका हतियार फिर्ता गराउने सवालमा गृहमन्त्रीको ध्यान नपुगिरहेको भन्दै उनले गृह प्रशासन चलाउने हैसियत राख्न नसकेको तर्क गरे ।