जेनजी आन्दोलनमा प्रहरीलाई ‘आमाबुवाबारे सोच्नुस्’ भन्ने यमबहादुरले गरे आफ्नै आमाको विभत्स ह*त्या

आइतबार राति ८ बजेतिर उनले गाउँघरतिर पाइने भन्दा फरक खालको हतियार बोकेर घर प्रवेश गरेका थिए । घरमा भान्जाभान्जी, बुवा, आमा र यमबहादुरसहित पाँच जना थिए । उनले सुरुमा भान्जालाइ खुकुरी प्रहारको प्रयास गरे । भान्जा भागेपछि बुवालाई पनि प्रहार गर्न खोजेका थिए । यबमबहादुरका बुवा पनि भागेपछि उनले आमालाई प्रहार गरेका थिए । प्रहरी अधिकारीका अनुसार, आमाको टाउको र शरीर छुट्टिनेगरी उनले विभत्स रुपमा हत्या गरेका थिए । हत्या गरेपछि आँगनमा शव राखेर उनले बुवालाई पनि धम्क्याए । एक स्थानीय जनप्रतिनिधिले भने, ‘हामीहरू प्रहरीसहित पुग्दा उनी हातमा खुकुरी नचाइरहेका थिए । बुवाको काँधमा खुकुरी राखेर आफूले ठिक गरेको भन्दै घटना लुकाउन यमबहादुरले धम्की दिइरहेका थिए ।’

यमबहादुरलाई सुधार गृहमा लानका लागि बुवा गोपबहादुर कँडेल लगायतले उनलाई पटकपटक भन्दै आएका थिए । ‘यसपटक पनि घरमा उसलाई सुधार गृह पठाउने कुरा चलेको रहेछ,’ घटनाका एक प्रत्यक्षदर्शीले भने, ‘यमबहादुरले मानेका रहेनछन् । सायद परिवार नै आफूलाई सुधार गृह पठाउने षड्यन्त्रमा लागेको शंका मानेर उसले हत्या गरेको हुनसक्छ ।’ ‘भान्जाले पुर्‍याए गाउँमा खबर’ खुकुरी प्रहारबाट उम्किएर भागेका यमबहादुरका भान्जाले गाउँमा खबर पुर्‍याएका थिए । उनले खबर लगेपछि स्थानीय जनप्रतिनिधिले प्रहरीमा खबर गरेका थिए । ‘भान्जाले गाउँमा आएर भनेपछि मात्रै हामीले थाहा पायौं,’ एक जनप्रतिनिधिले भने, ‘यसअघि पनि पटकपटक यस्ता गतिविधि देखेका थियौं । हामी एक्लै जान डराएर प्रहरीसहित पुगेर हेर्दा त्यस्तो घटना देख्यौं ।’

प्रहरीसहितको टोली पुग्दा पनि उनी घटनास्थलमै थिए । प्रहरी पुगेपछि पनि उनले ‘अघि बढ्ने भए बुवालाई पनि मारिदिन्छु’ भन्दै धम्की दिएका थिए ।सो क्रममा प्रहरीले उनलाई बल प्रयोग गरेर नियन्त्रणमा लिनपरेको थियो । ‘जेनजी आन्दोलनमा प्रहरीसँगै झोक्किएका थिए’ गत २४ भदौको जेनजी आन्दोलनमा यमबहादुर प्रहरीसँग झोक्किँदै भनाभन गरेका थिए । उक्त भिडियो अहिले सामाजिक सञ्जालमा भाइरल भइरहेको छ । प्रहरीसँग प्रतिवादमा उत्रिएका उनले आफूलाई गोली हान्न समेत चेतावनी दिएका थिए । ‘ठोक्ने भए गोली ठोक्नू । मार्ने भए मार्नू आनन्द त आउँछ । देशको बारेमा सोच्नै परेन । मेरो आत्मा भगवानले लानु हुन्छ । जिउँदो भए त देशको चिन्ता र तपाईँको आत्माले गर्दा सुत्नै सक्दैन,’ उनले प्रहरीलाई भनेका थिए ।

साथै, उनले प्रहरीसँग रिसाउँदै आफ्ना आमाबुवा र देशको बारेमा सोच्न पनि भनेका थिए ।  म वान म्यान आर्मी हो । भारतीय र अमेरिकी पुजीँवाद दलाल र यो देशका दलालसँग एक्लै लड्न सक्ने क्यापिसिटी छ,’ उनले भनेका थिए, ‘त्यसैले तपाँइहरू पनि  बेलैमा जनताका लागि सोच्नुस् । तपाईँहरुको आफ्ना आमाबुवा र देशको बारेमा सोच्नुस् ।’ उनको उक्त भिडियो सञ्जालमा धेरै हेरिएको थियो । तर, उनले गएराति आफूलाई जन्म दिने आमाकै विभत्स हत्या गरेका छन् । विगतका मुद्दा उनीविरुद्ध यसअघि पनि प्रहरीमा विभिन्न मुद्दा चलेको अनुसन्धानका क्रममा देखिएको छ । प्रहरीको सीडीआर रिपोर्टमा हेर्दा, ०६९ सालमा उनीविरुद्ध सार्वजनिक मुद्दा चलेको देखिन्छ । अन्य प्रहरीमा पनि उनीविरुद्ध मुद्दा छन् भन्ने आएको छ । डाटा नभेटिएको हुनसक्छ, काठमाडौंको स्वयम्भू, हनुमानढोकामा पनि छ भनेर बुझ्दैछौं,’ अनुसन्धानमा खटिएका एक प्रहरीले बताए । ती प्रहरी अधिकारीका अुनसार, यस्ता खालका विभत्स हत्या भएका घटनाहरू यसअघि कमै भेटिएका छन् । मैले अहिलेसम्म यस्ता खालका घटनाहरू एकदमै कमै देखेको छु । यस्ता बीभत्स घटना कमैमात्र घट्छन्,’ अनुसन्धानमा खटिएका ती प्रहरी अधिकारी भन्छन् । उनलाई अहिले प्रहरीले हिरासतमा राखेको छ ।