सुनसरीबाट ६ सय ३७ किलो गाँजा बरामद

१२ असोज, सुनसरी ।

सुनसरीको कोसी गाउँपालिकाबाट प्रहरीले ठुलो परिमाणमा गाँजा बरामद गरेको छ। कोसी गाउँपालिका ७ मा बेवारिसे अवस्थामा १८ बोरा लागू औषध गाँजा प्रहरीले फेला पारेको हो। चाडपर्व विशेष सुरक्षा अन्तरगत गस्ती गर्ने क्रममा गए राती २ बजेको समयमा अस्थायी प्रहरी चौकी हरिपुरबाट खटिएको प्रहरी टोलीले कोसी गाउँपालिका–७ स्थित पूर्व पश्चिम राजमार्गको सडक किनारामा १८ वटा प्लास्टिकको बोरामा गाँजा बरामद भएको प्रहरीले जनाएको छ।

करिब ६ सय ३७ किलो ४५ ग्राम गाँजा बेवारिसे अवस्थामा फेला पारी बरामद गरेको जिल्ला प्रहरी कार्यालय सुनसरीले जनाएको छ। गाँजा बरामद भए सँगै ओसार पसारमा संलग्न व्यक्तिहरूको खोजतलास भइरहेको छ।  यसै गरी उदयपुरको अस्थायी प्रहरी पोस्ट नेपालटारबाट खटिएको प्रहरी टोलीले चेक जाँचको क्रममा सिराहा लहान नगरपालिका–१७ की लीला देवी रामलाई ६ किलो ८४६ ग्राम र लहान– ८ की अस्मिता रामलाई ५ किलो ६ ग्राम  गाँजा सहित नियन्त्रणमा लिएको छ।