सर्लाही, १३ साउन ।

सर्लाही जिल्लामा लामो समयदेखि वर्षा नभएपछि उत्पन्न भएको खानेपानी संकटका बेला मलंगवा नगरपालिका–८ का व्यापारी एवं समाजसेवी सुभाष गुप्ताले मानव सेवा गर्दै आइरहेका छन्। गुप्ताले आफ्नो निजी लगानीमा ट्यांकरमार्फत मलंगवा वडा–८ का स्थानीय बासिन्दालाई निःशुल्क पानी वितरण गर्दै आएका छन्।

केही दिनदेखि निरन्तर रुपमा घर–घरमा पानीको टंकी पुर्याउने कार्यमा लागेका गुप्ताको पहलले स्थानीयहरूलाई ठूलो राहत पुगेको छ। दैनिक जीवनमा अत्यावश्यक खानेपानीको अभावबीच समाजसेवी गुप्ताको यस्तो सेवा भावप्रति स्थानीय बासिन्दाहरूले आभार व्यक्त गरेका छन्।

स्थानीयवासीहरूले समाजसेवी गुप्ताको प्रयासलाई मानव सेवा नै ठूलो धर्म हो भन्ने मुल नाराको उदाहरणको रूपमा लिएका छन्। वर्षा अभावले सर्लाही सदरमुकाम मलंगवा लगायत विभिन्न स्थानहरूमा गम्भीर जल संकट उत्पन्न भइरहेको बेला गुप्ताको यस्तो योगदान अत्यन्तै सराहनीय मानिएको छ।