७ साउन, सर्लाही ।

सर्लाहीको सदरमुकाम मलङ्गवास्थित प्रादेशिक अस्पतालमा कार्यरत एक चिकित्सकमाथि हातपात भएको घटनापछि अस्पतालको ओपिडी सेवा बन्द गरिएको छ। सोमबार राति एक बिरामीका आफन्तले अर्थोपेडिक डा. कृष्णजङ्ग साहमाथि हातपात गरेका थिए।

हड्डी भाँचिएका बिरामीलाई थप उपचारका लागि अन्यत्र रेफर गर्ने विषयमा असन्तुष्टि जनाउँदै ती आफन्तले डा. साहमाथि हातपात गरेका हुन्। उक्त घटनापछि अस्पतालका चिकित्सक तथा स्वास्थ्यकर्मीहरूले दोषीमाथि कारबाहीको माग गर्दै मंगलबारदेखि आकस्मिकबाहेकका सम्पूर्ण सेवा बन्द गरेका छन्। अस्पतालका मेडिकल सुपरिटेन्डेन्ट डा. सञ्जीव सिंहले घटनाको भर्त्सना गर्दै दोषीलाई कानुनी दायरामा ल्याउन आग्रह गर्नुभएको छ।

नेपाल चिकित्सक संघले पनि प्रेस विज्ञप्ति जारी गर्दै चिकित्सकमाथि हातपात गर्ने व्यक्तिलाई तत्काल पक्राउ गरी कडा कारबाही गर्न माग गरेको छ। ओपिडी सेवा बन्द हुँदा अस्पतालमा उपचारका लागि आएका सर्वसाधारण बिरामीहरू मर्कामा परेका छन्। स्थानीयवासीले समेत यस्तो घटनाले अस्पतालमा सेवा प्रवाहमा गम्भीर असर पार्ने भन्दै दुःख व्यक्त गरेका छन्।