८ जेठ, अछाम। 

अछामको बान्नीगढी जयगढ गाउँपालिका–३ का ५८ वर्षीय टेकबहादुर साउद र उनकी श्रीमती ५५ वर्षीय देउमा साउद भारत जान भनेर बुधबार घरबाट निस्किए। उनका दुई छोरा भारतमा छन्।  कान्छा छोरा विष्णु छत्तीसगढमा व्यवसाय गर्छन्। साउद दम्पती पनि भारत आउजाउ गरिरहन्थ्यो। छोरासँग भेटघाट पनि गर्ने र त्यहीँ व्यवसायमा सघाउने भनेर उनीहरू घरबाट हिँडेका थिए। बिहीबार कैलालीको धनगढी पुगेका उनीहरूसँग अरू गाउँले पनि थिए। जिप बुक गरेर लखनउसम्म यात्रा तय गरे, उनीहरूले। तर, पलिया–लखनउ सडकखण्डमा उनीहरू सवार गाडीलाई अर्को गाडीले ठक्कर दिएर भयानक दुर्घटना भयो। दुर्घटनामा साउद दम्पतीको ज्यानै गयो।

‘छोराहरू भारतमै मःमको ठेला चलाउँछन्। आमाबुवा भेटघाटका लागि त्यता गइरहन्थे,’ बान्नीगढी जयगढ गाउँपालिका–५ का अध्यक्ष टेकबहादुर साउद भन्छन्, ‘जिपमा ८-९ जना सवार रहेको कुरा सुनेको छु।’ बान्नीगढी जयगढ गाउँपालिका–३ का अमिन साउद, उनकी श्रीमती र ७ वर्षीय छोरा अंशुसहित उनीहरूसँगै भारत जाँदै थिए।  घरमा ६० वर्षीया हजुरआमा अदोमती छन्। अदोमतीले टीकोटालो गरेर बुधबार छोरा, बुहारी र नातीलाई बिदाइ गरेकी थिइन्। अमिन पनि भारतमा काम गर्न गइरहन्छन्। दुर्घटनामा उनका छोरा अंशुको पनि मृत्यु भएको छ भने बुबाआमा घाइते भएका छन्।  बान्नीगढी जयगढ गाउँपालिका–३ का अध्यक्ष नवराज साउदका अनुसार दुर्घटनापछि धनगढीमा रहेका नजिकका आफन्त र समाजसेवी त्यतातिर गएका छन्। घाइतेको उपचार भइरहेको जानकारी आएको उनले बताए। हजुरआमाले टीकोटालो गरेर छोरा, बुहारी र नातिलाई बिदा गरेको भन्दै थिए। आज यस्तो दुःखद खबर सुनियो,’ उनी भन्छन्, ‘वृद्ध अदोमतीलाई आजै मैले उनकै कामका लागि मंगलसेन पठाएँ। दुःखद् खबर सुनाउनै सकेको छैन।’