२० वैशाख, बारा।

बारा प्रहरीले दुई सय २५ किलो प्रतिबन्धित लागु औषध गाँजा सहित चार जना मानिसलाई नियन्त्रणमा लिएको छ। जिल्ला प्रहरी कार्यालय बाराका अनुसार शनिबार विहान ट्रयाक्टर, प्रतिबन्धित लागु औषध गाँजा तथा चार जना मानिसलाई नियन्त्रणमा लिइएको हो। ईलाका प्रहरी कार्यालय बारागढीले बाराको आदर्शकोतवाल गाउँपालिका ३ वतरा स्थित खेतमा पार्किङ गरि राखेको प्र.२–०३–००१त ४८७६ नम्बरको ट्याक्टरको ढाला मुनिबाट सो गाँजा बरामद गरेको हो।

त्यहाँ फल्स बटन बनाई लागू औषध गाँजा लुकाई छिपाई राखिएको छ भन्ने गोप्य सूचना प्राप्त हुन साथ इलाका प्रहरी कार्यालय बारागढीबाट प्रहरी निरीक्षक कुसुम नायकको कमाण्डमा खटिएको प्रहरी टोलि सोही स्थानमा पुगि ट्याक्टरको जाँच गरेको हो। टोलिले ढालामुनि फल्स बटन बनाइएको ठाउँमा प्लास्टिकले बेरिएको १५ वटा कार्टुनमा रहेको २२५ के.जी.लागु औषध गाँजा र ट्याक्टर नियन्त्रणमा लिई इलाका प्रहरी कार्यालय बारागढी बारामा ल्याएर राखेको छ। प्रहरीले आदर्शकोतवाल गाउँपालिका वडा नम्बर ३ बतराका ट्याक्टर चालक ३० वर्षीय नन्दकिशोर मुखिया बिन समेतलाई नियन्त्रणमा लिई सोधपुछ गर्दै जादा थप ३ जना लागु औषध गाँजामा संलग्न मनिसहरुलाई प्रहरीले पक्रन सफल भएको जनाएको हो।

प्रहरीले कोल्हवी नगरपालिकामा रहेको रोज उड होटलको कोठा नं. ३०३ बाट उनीहरुलाई नियन्त्रणमा लिएको हो। मकवानपुर हेटौडा नगरपालिका ४ का २१ वर्षीय कमाण प्रजा,मकवानपुरको कैलास गाउँपालिका ४ देवतिसका २४ वर्षीय सिताराम प्रजा र कवानपुरको बकैया गाउँपालिका ५ छतिवनका२२ वर्षीय नवराज मगरलाई प्रहरीले नियन्त्रणमा लिएको हो। उनीहरुलाई जिल्ला प्रहरी कार्यालय बारामा ल्याइएको जनाइएको छ।