लरेन्स बिश्नोईको नाममा ह्वाट्सएपबाट धम्की दिँदै व्यापारीसँग ५ करोड माग्ने पक्राउ

२० चैत, काठमाडौं ।

आफूलाई भारतीय कुख्यात ग्याङस्टर बताउँदै ह्वाट्सएपमार्फत व्यापारीहरूलाई धम्क्याएको आरोपमा एक व्यक्ति पक्राउ परेका छन् । इलाका प्रहरी कार्यालय कोहलपुर, बाँकेले सुर्खेतको भेरीगंगा नगरपालिका–७, काठेघारीका ४१ वर्षीय रामबहादुर बुढा क्षेत्रीलाई बाँकेको कोहलपुर नगरपालिका–५ बाट पक्राउ गरेको हो ।

क्षेत्रीले नेपालगञ्जका विभिन्न व्यापारीहरूलाई ह्वाट्सएप मेसेज पठाएर आफू लरेन्स बिश्नोई वा अनमोल बिश्नोई भएको भन्दै धम्क्याउने गरेका थिए । उनले विभिन्न व्यापारीहरूबाट पाँच करोड भारू फिरौती मागेको र रकम नदिए जेसुकै हुनसक्ने चेतावनी दिएको आरोपमा पक्राउ गरिएको इलाका प्रहरी कार्यालय कोहलपुरका प्रहरी निरीक्षक हरि भट्टराईले टेकपानालाई जानकारी दिए । प्रहरीका अनुसार क्षेत्रीले विदेशी नम्बर प्रयोग गरेर ह्वाट्सएप खोलेका थिए । बरामद मोबाइलमा लरेन्स बिश्नोई र अनमोल बिश्नोईको नाममा धम्कीपूर्ण मेसेजहरू पठाइएको प्रमाण फेला परेको छ । साथै, क्षेत्रीसँग भारतीय आधारकार्डसमेत रहेको पाइएको छ ।

क्षेत्री २०५९ सालमा नेपाली सेनामा भर्ती भएका थिए, तर केही समयपछि नै जागिर छाडेर फरार भएका थिए । त्यसयता उनी विभिन्न आपराधिक गतिविधिमा संलग्न रहँदै आएका छन् । उनी पहिलो पटक २०६१ साल साउन २७ गते एक युवतीलाई विवाह गर्ने प्रलोभनमा पारेर भारत लैजान खोज्दा पक्राउ परेका थिए । उनलाई त्यसबेला मानव बेचबिखन तथा ओसारपसार मुद्दा लागेको थियो । त्यसपछि २०६२ साल चैत ८ गते सर्वसाधारणसँग चन्दा असुली गरेको अभियोगमा तेस्रो पटक पक्राउ परे । यस्तै, २०६४ साल भदौ ९ गते एक व्यक्तिलाई ट्याक्सीमा नियन्त्रणमा लिएर फिरौती मागेको आरोपमा पक्राउ परेका थिए । २०६४ साल चैत २७ गते संविधानसभा निर्वाचनका उम्मेदवार ऋषि शर्माको प्रचारप्रसार सकेर सुर्खेत फर्किँदै गर्दा मेहलकुना जहरेबजार नजिक गोली हानी हत्या गरिएको थियो ।

सो घटनामा संलग्न भएको आरोपमा क्षेत्रीविरुद्ध कर्तव्य ज्यान मुद्दा दायर भएको थियो । त्यसपछि २०६५ साल चैतमा द्वन्द्वपीडित सेना–प्रहरीको आन्दोलनमा हतियार खोस्ने आरोपमा पाँचौँ पटक पक्राउ परेका थिए । त्यसैगरी, कोटेश्वरस्थित निखिलेश्वर मन्दिरमा शक्ति बहादुर बस्नेतलाई गोली हानेको अभियोगमा मुद्दा चलेको थियो । यसै मुद्दामा उनी पाँच वर्ष कैद सजाय भोगेर २०७० साल फागुन २८ गते कारागारमुक्त भएका थिए । को हुन् लरेन्स बिश्नोई ?

लरेन्स बिश्नोई भारतका कुख्यात ग्याङस्टर हुन् । उनी फिरौती माग्ने र हत्या जस्ता संगठित आपराधिक क्रियाकलापमा संलग्न रहेको आरोपमा सन् २०१४ देखि भारतको कारागारमा छन् । उनीमाथि २९ मे २०२२ मा पन्जाबी गायक सिद्धू मुसेवालाको हत्या, भारतीय अभिनेता सलमान खानलाई ज्यान मार्ने षड्यन्त्र, बाबा सिद्दिकीको हत्या लगायतका आरोपहरू लगाइएका छन् । लरेन्सका भाई अनमोल बिश्नोई पनि आपराधिक गतिविधिमा संलग्न रहेको मानिन्छ । दाजु जेलमा रहँदा उनले विभिन्न व्यापारी र उद्योगपतिहरूलाई धम्क्याएर फिरौती माग्ने गरेको बताइन्छ ।