विराटनगर- विराटनगर विमानस्थलबाट प्रहरीले एक ब्यक्तिको साथबाट अमेरिकी १ सय डलरको ८१ थान नोट बरामद गरेको छ । जिल्ला प्रहरी कार्यालय मोरङका अनुसार शुक्रबार राति करिब ८ बजे सुनसरीको भोक्राहा नरसिंह गाउँपालिका–५ का ३४ वर्षीय नौसाद अन्सारीलाई विमानस्थलबाट पक्राउ गरेको हो ।

कार्यालयका प्रमुख प्रहरी उपरिक्षक नारायण चिमरियाले काठमाडौँ जाने तयारीमा रहेका अन्सारीको साथबाट अवैध रूपमा बोकेको अमेरिकी डलर बरामद गरेको जानकारी दिए । यती एयरलाइन्सको जहाजबाट काठमाडौं जाने तयारीमा रहेका अन्सारीलाई चेकजाँचका क्रममा कोटबाट प्रहरी वरिष्ठ नायव निरीक्षक श्याम सुवेदी नेतृत्वको टोलीले अमेरिकी डलर फेला परेको थियो ।

प्रहरी प्रमुख चिमरियाले बरामद गरिएको डलर नेपाली रूपैयाँ १ लाख १२ हजार बराबर हुने बताए। घटनाबारे अनुसन्धान सुरू गरिएको प्रहरीले जनाएको छ।  पक्राउ परेका अन्सारीले विदेशबाट आएका साथीलाई नेपाली रूपैयाँ दिएर आफूले डलर लिएको प्रहरीलाई बताएका छन् । केही समयअघिसम्म कतार बसेर आएको बताएका अन्सारीले कतारमा बस्ने र नेपाल आउने-जाने गरेको उल्लेख गरेका छन्।