सर्लाहीमा बसको ठ*क्करबाट एक जनाको मृ*त्यु

२४ वैशाख, सर्लाही । अमलेश शर्मा

सर्लाहीको हरिपुर्वा नगरपालिका–९ खिला नजिक बिहीबार बिहान बसको ठक्करबाट एक जनाको मृत्यु भएको छ । मृत्यु हुनेमा महोत्तरीको गौशाला नगरपालिका–१२ कान्तिबजार निवासी ३६ वर्षीय श्याम ठाकुर रहेको प्रहरीले जनाएको छ । उनलाई ‘पप्पु’ भनेर चिनिने गरिएको थियो ।

प्रहरीका अनुसार संग्रामपुरबाट बाँकेतर्फ आउँदै गरेको ग १ ख ९४६७ नम्बरको यात्रुवाहक बसले विपरीत दिशाबाट जाँदै गरेको ना ४८ प ४७० नम्बरको मोटरसाइकललाई ठक्कर दिएको थियो । दुर्घटनामा गम्भीर घाइते भएका ठाकुरलाई उपचारका लागि प्रादेशिक अस्पताल मलंगवा लगिएको थियो । अस्पतालले उनलाई मृत घोषणा गरेको जिल्ला प्रहरी कार्यालय सर्लाहीका प्रवक्ता प्रहरी नायब उपरीक्षक सरोज राईले जानकारी दिए । प्रहरीले दुर्घटनामा संलग्न बस र बसधनी पर्सा गाउँपालिका–२ का २७ वर्षीय मानिष कुमार महतोलाई नियन्त्रणमा लिएको जनाएको छ । बस चालक कविलासी नगरपालिका–१० सलेमपुरका ४५ वर्षीय बद्री मण्डल भने फरार रहेका छन् । घटनाबारे थप अनुसन्धान भइरहेको प्रहरीले जनाएको छ ।