गाँजा बोकेको मोटरसाइकलको ठक्करबाट एक जना गम्भीर, दुई जना फरार
सारांश
- सर्लाहीको हरिपुर्वा नगरपालिका–९, बसन्तपुरमा गाँजा बोकेको मोटरसाइकलको ठक्करबाट एक जना गम्भीर घाइते भएका छन्।
- घटनापछि मोटरसाइकल र गाँजा छाडेर दुई जना फरार भएका छन्।
- शनिबार बिहान करिब ४:३० बजे गाँजा बोकेर जाँदै गरेको मोटरसाइकलले स्थानीय बिल्टु राय यादवलाई ठक्कर दिएको थियो।
५ मंसिर सर्लाही, ।
सर्लाहीको हरिपुर्वा नगरपालिका–९, बसन्तपुरमा गाँजा बोकेको मोटरसाइकलको ठक्करबाट एक जना गम्भीर घाइते भएका छन्। घटनापछि मोटरसाइकल र गाँजा छाडेर दुई जना फरार भएका छन्।
शनिबार बिहान करिब ४:३० बजे गाँजा बोकेर जाँदै गरेको मोटरसाइकलले स्थानीय बिल्टु राय यादवलाई ठक्कर दिएको थियो। बागमती प्रदेश–०२–०१५ प ८६६८ नम्बरको पल्सर १५० मोटरसाइकलमा दुई जना सवार रहेको बताइएको छ।

मोटरसाइकलको ठक्करबाट यादव गम्भीर घाइते भएका छन्। उनलाई उपचारका लागि महोत्तरीको पर्सास्थित जानकी हेल्थ केयरमा लगिएको छ। घटनापछि स्थानीयले मोटरसाइकलमा सवार व्यक्तिहरूसँग सोधपुछ गर्न खोज्दा उनीहरू मोटरसाइकल र गाँजा छाडेर फरार भएका थिए। घटनाको जानकारी पाएलगत्तै गौरीशंकर प्रहरी चौकी र इलाका प्रहरी कार्यालय केशरगञ्जबाट प्रहरी टोली घटनास्थल पुगेको थियो। प्रहरीले घटनास्थलको जाँच तथा मुचुल्का गर्ने क्रममा मोटरसाइकलमा रहेको २० किलो ९८० ग्राम गाँजा बरामद गरेको जनाएको छ। फरार व्यक्तिहरूको खोजी तथा घटनाबारे थप अनुसन्धान भइरहेको प्रहरीले जनाएको छ।

प्रतिक्रिया