लक्ष्मीपूजाको रात सर्लाहीका तीन ठाउँमा आगलागी, करोडौंको क्षति
सारांश
- लक्ष्मीपूजाको दिन सोमबार राति सर्लाहीका तीन स्थानमा आगलागी हुँदा करोडौं रुपैयाँ बराबरको सम्पत्ति नष्ट भएको छ प्रहरीले जनाएको छ।
- सबैभन्दा ठूलो क्षति लालबन्दी नगरपालिका–५ मेजरगञ्जमा भएको हो ।
- लालबन्दी–७ का कैलाश साहले किराना समान राखेका गोदाममा राति करिब ११ः३० बजे आगलागी भएको थियो ।
४ कात्तिक, सर्लाही ।
लक्ष्मीपूजाको दिन सोमबार राति सर्लाहीका तीन स्थानमा आगलागी हुँदा करोडौं रुपैयाँ बराबरको सम्पत्ति नष्ट भएको छ प्रहरीले जनाएको छ। सबैभन्दा ठूलो क्षति लालबन्दी नगरपालिका–५ मेजरगञ्जमा भएको हो । लालबन्दी–७ का कैलाश साहले किराना समान राखेका गोदाममा राति करिब ११ः३० बजे आगलागी भएको थियो । गोदाममा लागेको आगो नियन्त्रणमा लिन नेपाली सेनाको कालिध्वज गण पाँचकुमारी ब्यारेकका प्रमुख सेनानी उमेश खड्का, इलाका प्रहरी कार्यालय लालबन्दीका इन्स्पेक्टर वीरेन्द्रसिंह जोहारी नेतृत्वको टोली र स्थानीयवासी सक्रिय भएका थिए ।
सेनाको दमकलसहितको टोली र स्थानीयको सहयोगमा करिब एक घण्टापछि आगो नियन्त्रणमा लिन सकिएको थियो । प्रारम्भिक विवरणअनुसार आगलागीबाट करिब दुई करोड रुपैयाँ बराबरको किराना सामान जलेर नष्ट भएको बताइएको छ । गोदामधनीका अनुसार उनी लक्ष्मीपूजा गरेर फर्किएलगत्तै आगो लागेको हो । मैनबत्तीबाट आगलागी भएको अनुमान गरिएको छ, तर आधिकारिक पुष्टि भएको छैन ।
यस्तै, कविलासी नगरपालिका–१ पिपरियामा बब्लु मण्डलको घरमा पनि दीपावलीका क्रममा बालिएको दियोबाट आगो सल्किँदा घर र सरसामान जलेर करिब चार लाख ३० हजार रुपैयाँ बराबरको क्षति भएको छ । त्यसतै, चक्रघट्टा गाउँपालिका–५ का श्यामसुन्दर रायको घरमा विद्युत् सर्ट हुँदा लागेको आगोले करिब ५० हजार रुपैयाँ बराबरको कपडा, पंखा र नगद जलेर नष्ट भएको छ जिल्ला प्रहरी कार्यालय सर्लाहीले जनाएको छ।
प्रतिक्रिया