बेलायतका सभामुखसँग राजदूत घिमिरेको भेटवार्ता, द्विपक्षीय सहकार्यबारे छलफल
सारांश
- बेलायतका लागि नेपाली राजदूत चन्द्रकुमार घिमिरेले बेलायती संसदको तल्लो सदनका सभामुख लिन्डसे होइलसँग भेटवार्ता गरेका छन् ।
- वेस्टमिन्स्टर दरबारस्थित सभामुखको कार्यकक्षमा भएको भेटमा नेपाल–बेलायत सम्बन्धका विविध पक्षमा कुराकानी भएको दूतावासले जनाएको छ।
- भेटमा दुई देशबीच करिब दुई शताब्दी पुरानो सम्बन्धलाई स्मरण गर्दै राजदूत घिमिरेले प्रतिनिधि सभाका सभामुख देवराज घिमिरेको सन्देश हस्तान्तरण गरेका थिए ।
३० चैत, काठमाडौं ।
बेलायतका लागि नेपाली राजदूत चन्द्रकुमार घिमिरेले बेलायती संसदको तल्लो सदनका सभामुख लिन्डसे होइलसँग भेटवार्ता गरेका छन् । वेस्टमिन्स्टर दरबारस्थित सभामुखको कार्यकक्षमा भएको भेटमा नेपाल–बेलायत सम्बन्धका विविध पक्षमा कुराकानी भएको दूतावासले जनाएको छ।
भेटमा दुई देशबीच करिब दुई शताब्दी पुरानो सम्बन्धलाई स्मरण गर्दै राजदूत घिमिरेले प्रतिनिधि सभाका सभामुख देवराज घिमिरेको सन्देश हस्तान्तरण गरेका थिए । राजदूत घिमिरेले नेपालको संविधान, लोकतान्त्रिक अभ्यास र संसदको ऐतिहासिक विकासक्रमबारे सभामुख होइललाई जानकारी गराएका थिए । साथै, नेपाल–बेलायत सम्बन्ध ऐतिहासिक र सौहार्दपूर्ण भएको उल्लेख गर्दै आपसी सहकार्यलाई अझ सुदृढ बनाउने कुरामा जोड दिएका थिए ।
भेटका क्रममा सभामुख होइलले बेलायती संसदलाई ‘विश्वका संसदहरूको जननी’ भएको बताउँदै नेपालको लोकतान्त्रिक यात्राप्रति चासो व्यक्त गरेका थिए । उनले भविष्यमा पनि बेलायत सरकार नेपालसँग सहकार्य गर्न तयार रहेको बताए । भेटमा पर्यटन, व्यापार, शिक्षा र गोर्खा समुदायसम्बन्धी विषयमा समेत छलफल भएको दूतावासले जानकारी दिएको छ । राजदूत घिमिरेले गोर्खा सम्बन्धी विषयहरूमा बेलायती सरकारको निरन्तर सहयोग अपेक्षा गरिएको उल्लेख गरेका थिए ।
प्रतिक्रिया