तयार भयो समाजवादी मोर्चाको मञ्च, प्रदर्शनीमार्गमा सवारी निषेध
सारांश
- समाजवादी मोर्चाका कार्यकर्ताहरुले प्रदर्शनीमार्गमा मञ्च व्यवस्थापनको तयारी सकेका छन् ।
- ‘यथास्थिति र प्रतिगामी षड्यन्त्रको विरोध गरौं, गणतन्त्रको सम्बर्द्धन र राष्ट्रिय स्वाधिनताको संरक्षण गरौं,’ नारा लेखिएको ठूलो रातो ब्यानर राखिएको छ ।
- आज बिहान नेकपा माओवादी केन्द्रका महासचिव देव गुरुङ प्रदर्शनीमार्ग पुगेर मञ्च व्यवस्थापनबारे जानकारी लिएका छन् ।
१५ चैत, काठमाडौं ।
समाजवादी मोर्चाका कार्यकर्ताहरुले प्रदर्शनीमार्गमा मञ्च व्यवस्थापनको तयारी सकेका छन् । ‘यथास्थिति र प्रतिगामी षड्यन्त्रको विरोध गरौं, गणतन्त्रको सम्बर्द्धन र राष्ट्रिय स्वाधिनताको संरक्षण गरौं,’ नारा लेखिएको ठूलो रातो ब्यानर राखिएको छ । आज बिहान नेकपा माओवादी केन्द्रका महासचिव देव गुरुङ प्रदर्शनीमार्ग पुगेर मञ्च व्यवस्थापनबारे जानकारी लिएका छन् ।
मञ्च बनाउने जिम्मा समाजवादी मोर्चाको मुख्य घटक नेकपा माओवादी केन्द्रले लिएको थियो । रातिदेखि नै माओवादी नेता कार्यकर्ताहरु प्रदर्शनीमार्गमा खटिएका थिए । मञ्चको तयारीका लागि प्रदर्शनीमार्गमा सवारी आवागमन बन्द गरिएको छ । रत्नपार्क–भद्रकाली सडकखण्डबाट राष्ट्रिय सभा गृहतर्फ मोडिने ठाउँ र न्यूप्लाजा–पुतलीसडक सडकखण्डको पद्मोदय स्कुलनेरबाट रत्नराज्य क्याम्पसतर्फ जाने सडकमा सवारी साधन प्रवेशमा रोक लगाइएको छ । सधैं व्यस्त हुने गरेको यो सडकखण्डमा आज गाडीहरु नदेखिँदा सुनसान देखिन्छ । स्वयंसेवकको टोली मञ्च व्यवस्थापनमा खटिएको छ । मञ्चमा झण्डा, ब्यानर राख्ने र साउण्डसिस्टम जोड्ने काममा कार्यकर्ताहरु सक्रिय छन् । सडक किनारका भित्ता र रेलिङहरुमा पनि झण्डा र ब्यानर टाँगिएको छ ।
समाजवादी मोर्चाले भ्रष्टाचार र बेथितिविरुद्ध सरकारलाई खबरदारी गर्न प्रदर्शन र सभा गर्न लागेको हो । काठमाडौं उपत्यकाका विभिन्न स्थानबाट निस्किने र्याली प्रदर्शनी मार्गमा भेला भएर सभामा परिणत हुने छ । मोर्चाले कोटेश्वर हुँदै पूर्वबाट आउनेहरु बबरमहलमा भेला भएर अगाडि बढ्ने तयारी छ । ललितपुरतर्फबाट आउनेहरु कुपण्डोलमा, कलंकी हुँदै पश्चिमतर्फबाट आउनेहरु त्रिपुरेश्वरमा, बालाजु हुँदै उत्तर पश्चिमबाट आउनेहरु सोह्रखुट्टेमा भेला हुनेछन् । त्यसपछि १२ बजेदेखि जुलुस सुरु गर्ने तयारी छ । सो जुलुस विभिन्न स्थान परिक्रमा गर्दै प्रदर्शनीमार्ग पुग्ने छ ।
प्रतिक्रिया