राष्ट्रिय खेलाडीहरूको गंगालाल हृदयरोग केन्द्रमा निःशुल्क स्वास्थ्य परीक्षण सुरुवात

२५ भदौ , काठमाण्डौ – राष्ट्रिय टिमका व्यवस्थापक र खेलाडीहरूको अबक निःशुल्क स्वास्थ्य परीक्षण हुने भएको छ ।सहिद गंगालाल राष्ट्रिय हृदयरोग उपचार केन्द्रले उनीहरूको निःशुल्क स्वास्थ्य परीक्षण गर्ने कार्यको आज सुरुवात भएको छ । देशको प्रतिनिधित्व गरेर अन्तर्राष्ट्रिय खेलमा योगदान गर्ने सबै खेलाडीहरूको मुटुसहित निःशुल्क स्वास्थ्य परीक्षण सम्बन्धी स्वास्थ्य तथा जनसंख्या मन्त्रालय र युवा तथा खेलकुट मन्त्रालयको पहलमा अस्पतासँग सम्झौता भएको हो । गत साउन २७ गते आफ्नो स्वास्थ्य क्षेत्रका योजना तथा प्राथमिकता घोषणाका क्रममा स्वास्थ्य तथा जनसंख्यामन्त्री प्रदीप पौडेलले देशका लागि खेल्ने खेलाडीहरूको स्वास्थ्य परीक्षणका लागि मन्त्रालयले आवश्यक व्यवस्था गर्ने घोषणा गरेका थिए ।त्यसै अनुरुप स्वास्थ्य तथा जनसंख्यामन्त्री पौडेल र युवा तथा खेलकुदमन्त्री तेजुलाल चौधरीको उपस्थितिमा युवा तथा खेलकुद मन्त्रालय, राष्ट्रिय खेलकुद परिषद र अस्पतालबीच खेलाडीको हरेक वर्ष मुटु परीक्षण गर्ने सम्बन्धी सम्झौता भएको हो । सम्झौताअनुसार यसका लागि आवश्यक आर्थिक व्यवस्थापन गंगालालले आफ्नै श्रोतबाट गर्नेछ । हाल केन्द्रकै तर्फबाट निःशुल्क परीक्षण भए पनि आगामी वर्षबाट थप वार्षिक कार्यक्रम बनाएर कार्यक्रम अघि बढाउने मन्त्रालयले तयारी गरेको स्वास्थ्य तथा जनसंख्यामन्त्री पौडेलको निजी सचिवालयले जनाएको छ । घोषणाबाट अन्तर्राष्ट्रिय प्रतिष्पर्धामा देशका तर्फबाट सहभागी राष्ट्रिय टिमका ७ सय ५७ खेलाडी लाभान्वित हुनेछन् । कार्यक्रमको प्यारालिम्पिकमा कास्य पदक विजेता पलेसा गोवर्द्धनको स्वास्थ्य परीक्षण गरेर परीक्षणको शुरूवात गरिएको थियो ।